tpp_chinaஜி-20 நாடுகளின் மாநாட்டுக்குச் சென்ற இரசிய அதிபர் விளடிமீர் புட்டீன், இந்தியத்  தலைமை அமைச்சர் நரேந்திர மோடி, பிரித்தானியத் தலைமை அமைச்சர் தெரெசா மே ஆகியோருக்கு சிறப்பான வரவேற்பைச் செய்த சீன அரசு பராக் ஒபாமாவிற்கு திட்டமிட்டு அவமரியாதை செய்தது. ஒபாமாவின் விமானம் தரை இறங்கியவுடன் அவர் விமானத்தில் இருந்து இறங்குவதற்கான தானியங்கிப் படி வழங்கப் படவில்லை. அவர் வழமைக்கு மாறாக விமானத்தின் உள்ளிருந்து இறக்கப் பட்ட படியால் இறங்க வேண்டியிருந்தது. அது மட்டுமல்ல ஒபமாவை வரவேற்க சீனாவிற்கு ஏற்கனவே பேச்சு வார்த்தைக்கு எனச் சென்றிருந்த அமெரிக்கத் தேசியப் பாதுகாப்பு ஆலோசகர் சூசான் றைஸ் ஒபாமாவிற்கு அண்மையில் செல்லாமல் அநாகரீகமான முறையில் தடுக்கப்பட்டார். ஒபாமாவின் வருகைக் காணச் சென்றிந்த அமெரிக்க ஊடகவியலாளர்களுடன் சீனா அதிகாரிகள் கடுமையாக நடந்து கொண்டனர். ஊடகவியலாளர்களுக்கு இது எங்கள் நாடு இது எங்கள் விமான நிலையம் என சீன அதிகாரிகள் அவர்கள் மீது சீறினர். சீனா கிழக்குச் சீனக் கடல், தென் சீனக் கடல், பசுபிக் பிராந்தியம் ஆகியவற்றில் செய்ய முனையும் விரிவாக்கத்திற்கு பராக் ஒபாமாவின் நிர்வாகம் எந்த அளவு தடை விதிக்கின்றது என்பதையும் அதனால் சீனா எந்த அளவு ஆத்திரம் அடைந்துள்ளது என்பதையும் இந்த நிகழ்வு எடுத்துக் காட்டுகின்றது.

பசுபிக் மாக்கடலின் மேற்குக் கரை

பசுபிக் மாக்கடல் கிழக்கே அமெரிக்கக் கண்டத்தையும், மேற்கே ஆசியக் கண்டத்தையும் ஒஸ்ரேலியாவையும் எல்லைகளாகக் கொண்டது. உலக எரிபொருள் விநியோகத்தில் மூன்றில் இரண்டு பங்கு இந்து மாக்கடலினூடாக பசுபிக் மாக்கடலுக்குச் செல்கின்றது. உலக வர்த்தகத்தின் 30 விழுக்காடு தென் சீனக் கடலின் ஊடாகச் செல்கின்றது. அதில் 1.2ரில்லியன் டொலர்கள் பெறுமதியான வர்த்தகம் அமெரிக்காவிற்குச் செல்கின்றது.  ஒஸ்ரேலியா, கம்போடியா, சீனா, ஹொங்கொங், இந்தோனேசியா, லாவோஸ், மலேசியா, நியூசிலாந்து, பப்புவா நியூ கினி, பிலிப்பைன்ஸ், சிங்கப்பூர், தாய்வான், தாய்லாந்து, வியட்னாம் ஆகிய நாடுகள் பசுபிக் வளைய நாடுகளாகும். ஜப்பானும், இரசியாவின் மேற்குப் பிராந்தியம்மு பசுபிக் மாக்கடலுடன் தொடர்பு பட்டிருப்பதால் அவையும் பசுபிக் நாடுகளாகக் கருதப்படக் கூடியவையே, தென் கொரியாவும் இவ்வாறே பசுபிக் நாடாகும். சீனாவைப் பொறுத்தவரை தனது கடற்பரப்பு அதிகரிப்பிற்கும் பிராந்திய வர்த்தகத்திற்கும் இடையில் தடுமாறுகின்றது. சீனாவின் முன்னாள் தலைமை அமைச்சரும் சீனப் பொருளாதார சீர்திருத்தத்தின் முன்னோடியுமான டெங் ஜியாபிங் (Deng Xiaoping) அவர்களின் முக்கிய கொள்கையாக மற்ற நாடுகளுடன் மோதாமல் இருத்தல் என்பது இருந்தது. இதில் இருந்து எப்படி விலகுவது என்பதையிட்டு சீனா ஆழமாகச் சிந்திக்கின்றது. சீனாவுடன் ஓரு மோதலுக்கு என்றும் தயாராக இருப்பதால் மட்டுமே சீனாவுடனான மோதலைத் தடுக்கலாம் என ஜப்பானின் கொள்கை மாற்றமடைந்துள்ளது.

கிழக்குக் கரையில் இருந்து மேற்குக் கரையில் ஆதிக்கம்

பசுபிக் மாகடலின் கிழக்குக் கரையில் இருக்கும் அமெரிக்கா அதன் மேற்குக் கரையில் சீனா முழுமையான ஆதிக்கம் செலுத்துவதை விரும்பவில்லை. அதை முந்திக் கொண்டு தான் அங்கு ஆதிக்கம் செலுத்துவதற்கு துடிக்கின்றது. ஒஸ்ரேலியா, நியூசிலாந்து, ஜப்பான், தென் கொரியா ஆகிய நாடுகளுடனான உறவு அமெரிக்காவிற்கு சாதகமாக அமைந்துள்ளது. மற்ற ஆசிய நாடுகள் சீனாவை இட்டு கொண்டுள்ள அச்சமும் அமெரிக்காவிற்கு வாய்ப்பாக அமைந்துள்ளது. இதனால்தான் பல ஆண்டுகள் அமெரிக்காவுடன் போர் புரிந்த நாடாகிய வியட்நாமின் மக்கள் அமெரிக்காவை உலகிலேயே அதிகம் நேசிப்பவர்களாக மாறியுள்ளனர். அமெரிக்க அதிபர் பராக் ஒபாமாவை தேவடியாள் மகன் என அழைத்த பிலிப்பைன்ஸ் அதிபர் அமெரிக்காவிற்கு ஆசியானில் தோன்றியுள்ள புதிய தடையாகும். கம்போடியா ஏற்கனவே சீனாவின் நெருங்கிய நட்பு நாடாக மாறிவிட்டது.

ஆசியான் நாடுகள்

புரூனே, மியன்மார்(பர்மா), கம்போடியா, இந்தோனேசியா, லாவொஸ், பிலிப்பைன்ஸ், சிங்கப்பூர், தாய்லாந்து, வியட்நாம் ஆகியவை ஆசியான் கூட்டமைப்பில் உள்ள நாடுகளாகும். இவற்றில் கம்போடியாவைத் தவிர ஏனைய நாடுகள் சீனாவுடனான வர்த்தகத்தைப் பெரிதும் விரும்புகின்றன. அதே வேளை சீனாவின் ஆதிக்கத்தில் இருந்து தப்ப ஐக்கிய அமெரிக்காவுடன் படைத்துறை ஒத்துழைப்பை நாடி நிற்கின்றன. இந்த இரண்டுக்கும் இடையிலான ஒரு சமநிலையைப் பேணுவதில் அவை திண்டாடுகின்றன. தென் சீனக் கடலில் ஏற்பட்டுள்ள முரண்பாடு சீனாவின் அயல் நாடுகளை அமெரிக்கா பக்கம் சாய வைத்துள்ளது.


வரைபடம் மூலம் ஆக்கிரமிக்கும் சீனா

அமெரிக்கா ஆசியச் சுழற்ச்சி மையம் என்ற திட்டத்தையும் பசுபிக் தாண்டிய வர்த்தகப் பாங்காண்மைத் திட்டத்தையும் தொடர்ந்து பசுபிக் மாக்கடல் மீதான ஆதிக்கப் போட்டி தீவிரமடைந்துள்ளது.  பசுபிக் தாண்டிய வர்த்தகப் பங்காண்மை பல பின்னடைவுகளைச் சந்தித்திருக்கும் வேளையிலும் பசுபிக்கை ஒட்டிய நாடுகளுடன் அமெரிக்காவின் வர்த்தக மற்றும் படைத்துறை ஒத்துழைப்புக்கள் சீனாவிற்குச் ச்வால் விடக்குடிய வகையில் அமையும். பசுபிக் மாக்கடலிலும் தென் சீனக் கடல் போல் ஒரு கொதிநிலையை உருவாக்கும் வகையில் சீனாவின் கல்வி அமைச்சு ஒரு புதிய உலக வரைபடத்தை வெளியிட்டுள்ளது. அதில் பசுபிக் மாக்கடலின் பெரும் பகுதியும் ஹவாய் தீவும், மைக்குரோனேசியாவின் பெரும் பகுதியும் சீனாவிற்கு சொந்தமானது எனக் காண்பிக்கப் பட்டுள்ளது.

அமெரிக்காவின் பசுபிக் தாண்டிய வர்த்தகப் பங்காண்மை 

அமெரிக்காவின் பசுபிக் தாண்டிய வர்த்தகப் பங்காண்மை ஒப்பந்தம் பசுபிக் வளைய நாடுகளுடனான வர்த்தகத்தை சீனாவை முந்திக் கொண்டு விருத்தி செய்வதை நோக்கமாகக் கொண்டது. இது சீனாவைச் சூழவுள்ள நாடுகளுடனான அமெரிக்காவின் உறவையும் வர்த்தகத்தையும் விரிவு படுத்தும் நோக்கம் கொண்டது. அமெரிக்க அதிபர் பராக் ஒபாமா 2012இல் தேர்தலில் வென்றவுடன் முதல் செய்த பயணம் சீனாவைச் சுற்றியுள்ள நாடுகளுக்கே. ஆசியான் மாநாட்டுக்குச் சென்ற ஒபாமா வியட்னாம், மலேசியா, சிங்கப்பூர் உட்படப் பல சீனாவின் அயல் நாட்டுப் பிரதிநிதிகளுடன் பசுபிக் தாண்டிய பங்காண்மை பற்றியே அதிகம் உரையாடினார். ஐக்கிய அமெரிக்கா, ஜப்பான், மலேசியா, வியட்னாம், சிங்கப்பூர், புரூனே, ஒஸ்ரேலியா, நியூ சிலாந்து, கனடா, சிலி பெரு ஆகிய நாடுகள் பசுபிக் தாண்டிய வர்த்தகப் பங்காண்மையில் இணைய ஒத்துக் கொண்டன. ஆனால் அதை ஒவ்வொரு நாடுகளினதும் பாராளமன்றங்கள் ஏற்றுக்கொள்வதில் பல பிரச்சனைகள் எதிர்கொள்ளப்படுகின்றன. 12 நாடுகளில் மலேசியப் பாராளமன்றம் மட்டுமே பசுபிக் தாண்டிய வர்த்தக உடன்படிக்கையை அங்கீகரித்துள்ளது. அமெரிக்க அதிபர் தேர்தலில் போட்டியிடும் ஹிலரி கிளிண்டனும் டொனால்ட் ரம்பும் தமது எதிர்ப்பை வெளிவிட்டுள்ளனர். பசுபிக் தாண்டிய பங்காண்மை சீனாவை அமெரிக்கா பொருளாதார ரீதியில் சுற்றி வளைக்கும் தந்திரமே. கனடிய அரசின் ஆய்வின் படி பசுபிக் தாண்டிய வார்த்தக பங்காண்மை உடன்படிக்கை கனடிய மொத்த பொருளாதார உற்பத்தியை 4 பில்லியன் டொலர்களால் அதிகரிக்கும். ப.தா.வ.ப உடன்படிக்கை பல பிரச்சனைகளைச் சந்தித்தாலும் அது பல மீள் பேச்சு வார்த்தைகளின் பின்னர் மீளவும் உயிர் பெறும் வாய்ப்புக்களே அதிகம்.

சீனாவின் கடற்படை டம்மி பீஸா?

சீனா ஒரு விமானம் தாங்கிக் கப்பலை வைத்திருந்தாலும் இன்னும் ஒரு விமானம் தாங்கிக் கப்பலை நிர்மாணித்துக் கொண்டிருந்தாலும் அது அமெரிக்காவின் விமானம் தாங்கிக் கப்பல்களுடன் ஒப்பிடுகையில் இரண்டு தலைமுறை பின் தங்கியுள்ளது. சீனாவின் விமானம் தாங்கிக் கப்பல் லியோனிங் முழுமையான செயற்பாட்டிற்கு வர இன்னும் ஒராண்டுக்கு மேல் எடுக்கலாம். சீனா பல வலுமிக்க நீர்மூழ்கிக் கப்பல்களை கொண்டிருந்தாலும் சீனக் கரையோரம் ஆழம் குறைந்த கடலாகும். அதனால் சீனக் கடற்படை ஒரு நீலக் கடல் கடற்படை (Blue Water Navy) அல்ல எனச் சில படைத்துறை வல்லுனர்கள் தெரிவிக்கின்றனர். நீலக் கடல் கடற்படை என்பது உலகின் எல்லாப் பாகங்களுக்கும் சென்று தாக்குதல் செய்யக் கூடிய கடற்படையாகும். சீனாவின் முத்து மாலைத் திட்டம் அரபிக் கடலுடன் முடிவடைகின்றது.

சீனாவின் காசோலை அரசுறவியல் (chequebook diplomacy)

ஒரு நாட்டின் பொருளாதாரம் அல்லது அதன் ஆட்சியாளர்கள் பொருளாதார நெருக்கடியில் இருக்கும் போது நிதி உதவி செய்து அதை தமது நட்பு நாடாக்குவது காசோலை அரசுறவியலாகும். சீனா குக் தீவுகள், மிக்ரோனேசியா, பப்புவா நியூ கினி, சமோ, டொங்கா ஆகிய பசுபிக் பிராந்திய நாடுகளுடன் தனது உறவை காசோலை அரசுறவாலேயே வளர்த்தது எனக் குற்றம் சாட்டப்படுகின்றது. சீனாவின் பொருளாதார வளர்ச்சியும் அபரிமிதமான கடற்படை வளர்ச்சியும் பல பசுபிக் கரையோர நாடுகளை அச்சமடைய வைத்துள்ளன. சீனாவிற்கு ஈடு கொடுக்க முடியாமல் அமெரிக்கா பசுபிக் பிராந்தியத்தில் இருந்து வெளியேறிவிடுமா என்ற அச்சமும் சில நாடுகளை ஆட்டிப்படைக்கின்றன. ஆனால் சீனாவின் மொத்தப் படைத்துறைச் செலவிலும் பார்க்க அமெரிக்கா தனது கடற்படைக்குச் செய்யும் செலவு அதிகமாகும். அமெரிக்கக் கடற்படையின் வலுவிற்கு சமமாக சீனக் கடற்படை வளர இன்னும் 30 ஆண்டுகள் எடுக்கும் எனச் சீன நிபுணர்களே மதிப்பிட்டுள்ளார்கள்.


இரசியாவும் பசுபிக் பிராந்தியமும்

சோவியத் ஒன்றியம் பசுபிக் பிராந்தியத்தில் பெரும் கடற்படையை நிறுத்தியிருந்தது. 1991-ம் ஆண்டு சோவியத் ஒன்றியம் வீழ்ச்சியடைந்த பின்னர் ஒன்றன் பின் ஒன்றாக பல இரசியக் கடற்படைக்கலன்கள் பசுபிக் பிராந்தியத்தில் இருந்து வெளியேறின. 2000-ம் ஆண்டு இரசியாவின் ஒரு வழிகாட்டி ஏவுகணை தாங்கிக் கப்பல் மட்டுமே பசுபிக்கில் இருந்தது. ஆனால் 2010-ம் ஆண்டு ஒரு பெரிய வழிகாட்டல் ஏவுகணைதாங்கிக் கப்பல், ஐந்து நாசகாரிக் கப்பல்கள், பத்து அணுவலுவில் இயங்கும் நீர் மூழ்கிக் கப்பல்கள், எட்டு டீசலில் இயங்கும் நீர் மூழ்கிக் கப்பல்கள் பசுபிக்கில் இரசியாவால் நிறுத்தப்பட்டன. 2015-ம் ஆண்டு செப்டம்பர் மாதம் 16 கண்டம் விட்டுக் கண்டம் பாயும் ஏவுகணைகளைக் கொண்ட ஒரு நீர்மூழ்கிக் கப்பலையும் இரசியா பசுபிக்கிற்கு அனுப்பியுள்ளது. ஒவ்வொரு கண்டம் விட்டுக் கண்டம் பாயும் ஏவுகணையும் பத்து அணுக்குண்டுகளைத் தாங்கிச் சென்று எதிரி இலக்குகள் மீது வீச வல்லன. இவை 8300 கிலோ மீட்டர் தூரம் பாயக் கூடியவை. இரசியாவின் இந்த ஒரு நீர்மூழ்கிக் கப்பலால் எந்த அளவு பெரிய அழிவை ஏற்படுத்த முடியும் என்பதைக் காட்டுகின்றது. இரசியாவால் மட்டுமே அமெரிக்காவின் படைத்துறைக்குப் புலப்படாத அணுவலுவில் இயங்கும் Borei- and Yasen-class வகை நீர்மூழ்கிக் கப்பலை உருவாக்க முடியும். 2020-ம் ஆண்டு இரசியா இப்படிப்பட்ட எட்டு நீர்மூழ்கிக் கப்பல்களை உலகெங்கும் நிறுத்தவுள்ளது.  1996-ம் ஆண்டு தொடங்கப் பட்ட இந்த நீர்மூழ்கிக் கப்பல் உருவாக்கும் திட்டம் பல தடைகளைத் தாண்டி நிறைவேற்றப் பட்டுள்ளது.

இந்தியாவின் முக்கியத்துவம்

பசுபிக்கில் இந்தியாவின் உதவி அமெரிக்காவிற்கு அவசியம்

7517 கிலோ மீட்டர் நிளமான கடற்கரையைக் கொண்ட இந்தியாவிற்கு உலகிலேயே முன்னணிக் கடற்படை அவசியம். அதற்கு ஏற்ப இந்தியாவும் தனது கடற்படையின் வலுவை மேம்படுத்திக் கொண்டே இருக்கின்றது. எதிரி உன் எல்லைக்கு வர முன்னர் எதிரியின் எல்லைக்கு நீ செல்ல வேண்டும் என்பது போல் இந்தியா செயற்பட வேண்டும் என்னும் நிலை இந்தியாவிற்கு உருவாகியுள்ளது. சீனாவின் எதிரி நாடுகளுடன் இந்தியா ஒத்துழைக்க வேண்டும் என்பதை இந்தியா அமெரிக்காவுடன் The Logistics Exchange Memorandum Agreement ( LEMOA) என்னும் உடன்படிக்கை செய்து கொண்டமை சுட்டிக் காட்டுகின்றது. அமெரிக்காவும் இந்தியாவும் வழங்கல் வசதி மாற்றிகளை மாற்றிக்கொள்ளும் இந்த உடன்படிக்கை 2016-ம் ஆண்டு ஓகஸ்ட் மாதம் கைச்சாத்திடப்பட்டது. பத்து ஆண்டுகளாக இழுபறிப்பட்ட இந்த உடன்படிக்கை இந்தியாவில் பலத்த எதிர்ப்புக்களுக்கு மத்தியில் கைச்சாத்திடப்பட்டுள்ளமை இரு நாடுகளுக்கும் இடையிலான ஒத்துழைப்பு எவ்வளவு கேந்திரோபாய முக்கியத்துவம் வாய்ந்தது எனச் சுட்டிக் காட்டுகின்றது. இந்த உடன்படிக்கையின் படி ஒரு நாட்டின் போர் விமானங்களும் போர்க்கப்பல்களும் மற்ற நாட்டின் துறைமுகங்களிலும் விமானத் தளங்களிலும் தங்கி எரிபொருள் மீள் நிரப்பல், பராமரிப்பு மற்றும் திருத்த வேலைகளைச் செய்ய முடியும். இது நரி கொக்குக்கு கொடுத்த விருந்து போன்றது. தற்போது உள்ள சூழ் நிலையில் அமெரிக்கப் போர்க்கப்பல்களும் போர் விமானங்களும் பெருமளவில் இந்தியாவைப் பயன்படுத்த முடியும். இந்தியா எந்த அளவு அமெரிக்காவில் உள்ள தளங்களைப் பாவிக்க முடியும் என்பது கேள்விக்குறியே. ஆனால் ஆசிய பசுபிக் பிராந்தியத்தில் உள்ள அமெரிக்கத் தளங்களை இந்தியா பயன் படுத்த முடியும், இந்த ஒப்பந்தம் இந்தியாவில் அமெரிக்கா படைத்தளங்களை அமைப்பதற்கு ஒப்பானதாகும். இந்த ஒப்பந்தத்தின் முழுவிபரங்கள் மூடி மறைக்கப்பட்டுள்ளன. அமெரிக்கா உலகக் கடல்களில் ஆதிக்கம் செலுத்துவதற்கு முதுகெலும்பாக இருப்பது அதன் விமானம் தாங்கிக் கப்பல்களே. ஆனால் ஒரு அமெரிக்கப் படைத்துறை நிபுணர் தான் அமெரிக்கக் கடற்படை மீது தாக்குதல் தொடுப்பதாயின் அதன் வழங்கற் கப்பல்கள் மீதே முதல் தாக்குதல் நடத்துவேன் என்றார். அமெரிக்காவின் விமானம் தாங்கிக் கப்பல்கள் கடுமையான பாதுகாப்புடன் பயணிப்பவை அவற்றின் மீது தாக்குதல் நடத்துவது பல நாடுகளுக்கு முடியாத காரியம். ஆனால் அமெரிக்காவின் வழங்கற் கப்பல்களுக்குப் பலத்த பாதுகாப்பு இல்லை. அமெரிக்காவின் இந்த வலுமின்மைப் புள்ளியை இந்திய உறவாலும் ஒத்துழைப்பாலும் சரி செய்ய முடியும். சீனாவின் படைத்துறையின் வழங்கற் சேவை எனப் பார்த்தால் அமெரிக்காவின் வழங்கற் சேவையுடன் ஒப்பிடுகையில் மிகவும் மோசமாகவே உள்ளது. அது மட்டுமல்ல சீனாவின் மொத்தப் படைத் துறையே களமுனை அனுபவம் இல்லாததாகும்.

சமநிலையைத் தீர்மானிக்கும் இந்தியா

இந்தியா ஒரு வல்லரசாக இல்லாத போதிலும் வல்லரசுகளிடையான ஆதிக்கப் போட்டியில் இந்து மாக்கடலில் படைத்துறைச் சம நிலையைத் தீர்மானிக்கும் நாடாக தற்போது இந்தியா இருக்கின்றது. அதாவது எந்த வல்லரசின் பக்கம் இந்தியா இருக்கின்றதோ அந்தப் பக்கம் அதிக வலுவுள்ளதாக இருக்கும். அதனால்தான் சீனாவிற்கு எதிராக ஐக்கிய அமெரிக்கா, இந்தியா, ஜப்பான் ஆகியவை கொண்ட ஒரு படைத்துறைக் கூட்டமைப்பை உருவாக்குவதில் ஜப்பானியத் தலைமை அமைச்சர் சின்சோ அபே அதிக அக்கறை காட்டுகின்றார் ஆனால் இந்த இரண்டு நாடுகளையும் நம்பி சீனாவிற்கு எதிராகக் கூட்டணி அமைத்து அதனுடனான பகைமையை மோசமாக்குவதா என இந்தியா யோசிக்கின்றது. இந்து மாக்கடலில் மட்டுமல்ல தென் சீனக் கடலிலும் மட்டுமல்ல பசுபிக் பிராந்தியத்திலும் படைத்துறைச் சமநிலையைத் தீர்மானிக்கும் வலிமையை இந்தியப் படைத்துறையின் வளர்ச்சி ஏற்படுத்தும். 2020-ம் ஆண்டு இரசியா தனது படத்துறையை புதுப்பிக்கும் திட்டத்தை நிறைவேற்றிய பின்னரும் சீனாவின் படைத்துறை மேலும் வளர்ச்சியடைந்த பின்னரும் உலகப் படைத்துறைச் சமநிலையைத் தீர்மானிப்பதில் இந்தியாவின் பங்களிப்பு முக்கியமானதாகவும் அவசியமானதாகவும் அமையும்.

Advertisements

Welcome நல்வரவு

Posted: September 15, 2008 in Main Page, Welcome
Tags: ,

culture

Welcome to my wordpress.

I publish my articles and poems here

அமெரிக்கா தலைமையிலான நேட்டோ கூட்டமைப்பு முன்னாள் சோவியத் ஒன்றிய நாடுகளை தன்னுடன் இணைந்து கொண்டமை இரசியாவை ஆத்திரப் பட வைத்தது. உக்ரேனும் நேட்டோவிலும் ஐரோப்பிய ஒன்றியத்திரும் இணையலாம் என்ற நிலை வந்த போது இரசியா அங்கு படைகளை அனுப்பி கிறிமியாவை தனதாக்கிக் கொண்டது. அதனால் அமெரிக்கா இரசியா அடக்கப்பட வேண்டும் என வீறு கொண்டு எழுந்தது. பன்னாட்டு நியமங்களையும் மீறி சீனா தென் சீனக் கடற் பிராந்தியத்தின் 90 விழுக்காடு தனக்குச் சொந்தமானது என்கின்றது. தென் சீனக் கடலில் தான் நிர்மாணிக்கும் தீவுகள் படைத்துறைக்குப் பயன்படுத்தப்பட மாட்டாது எனச் சொன்ன சீனா. அந்த உறுதி மொழியையும் மீறி அத்தீவுகளில் படைத் தளங்களை உருவாக்கியது. சீன நிர்மாணித்த தீவு உலக வர்த்தகத்தில் மூன்றில் ஒரு பகுதி பங்கின் போக்கு வரத்து சீனாவின் அச்சுறுத்தலுக்கு உள்ளாகுவதால் அமெரிக்காவும் ஜப்பானும் ஆத்திரமடைந்தன. ஈராக், சிரியா, யேமன், லிபியா ஆகிய நாடுகளில் ஈரானின் தலையீடு அதிகரித்து வருவதால் இஸ்ரேலும் சவுதி அரேபியாவும் அதிக கரிசனை கொண்டன. இவை போன்ற பல பிராந்திய முரண்பாடுகள் பல நாடுகளையும் தம் படைவலுவை அதிகரிக்க வேண்டிய நிலைக்குத் தள்ளியுள்ளது.

குறையும் இடைவெளியை அதிகரிக்க முயலும் அமெரிக்கா

இது வரை காலமும் ஐக்கிய அமெரிக்கா மற்ற வல்லரசு நாடுகளிம் பார்க்க மடைத்துறையிம் மிகவும் முன் தங்கி இருந்தது. இதை இடைவெளி நாளடைவில் சிறியதாகிக் கொண்டே போவதை உணர்ந்த அமெரிக்கா தன் படை வலுவைத் தொழிநுட்ப அடிப்படையில் மிகவும் முன்னேற்ற திட்டமிட்டுள்ளது. அமெரிக்கப் படைத்துறையான பெண்டகன் மிக அவசரமாக செயற்கை விவேகத் தொழில்நுட்பத்தை எல்லா படைக்கலன்களிலும் எல்லாப் படைதுறைச் செயற்பாடுகளிலும் உட்புகுத்துகின்றது.

ரடார்களும் விமானங்களும்

கடந்த ஐம்பது ஆண்டுகளாக போர்விமான உற்பத்திக்கும் அதை இனம் காணும் ரடார்கள் உற்பத்திக்கும் இடையில் கடும் போட்டி நிலவுகின்றது. இலத்திரன் அலைகளை வைத்து எதிரி விமானங்களில் இருந்து வரும் வெப்பத்தை வைத்தும் ஒலியை வைத்தும் இனங்காணுவதும், அதை தவிர்க்கும் தொழில்நுட்பத்தை விமான உற்பத்தியாளர்கள் உருவாக்குவதுமாக இருந்த காலம் போய் எதிரியின் விமானத்தில் இருந்து வரும் மின்காந்த அலைகளை வைத்து இனம் காணும் தொழில்நுட்பம் உருவாக்கப்பட்டது. இத்தாலியில் இப்போது ஃபோட்டோன்களை வைத்து எதிரி விமானங்களை இனம் காணும் (fully photonics-based coherent radar system) தொழில்நுட்பம் உருவாக்கப்படுகின்றது. இது உடனடி அதி உயர் வீச்சு பிரிதிறன் ரடார் (real-time ultra-high-range-resolution radar). இரசியாவும் “Radio-Photonic Radar”களை உருவாக்கியுள்ளது. இரசியாவின் ஆறாம் தலைமுறைப் போர்விமானங்களில் “Radio-Photonic Radar” பொருத்தப் பட்டிருக்கும். அவை எதிரி விமானங்களை துரிதமாகவு இலகுவாகவும் இனம் காணும். தற்போது அமெரிக்காவின் F-35 விமானத்தின் உணரிகள் எதிரி விமானங்கள் அதை இனம் காணுவதற்கு முன்னதாக அது எதிரி விமானங்களை இனம் கண்டு அழித்துவிடும். இந்த நிலைமையை மாற்றியமைக்கவே இரசியா “Radio-Photonic Radar”களை உருவாக்கியுள்ளது. இவை அமெரிக்காவின் புலப்படா விமானங்களை செல்லாக்காசாக்கலாம்.

அடுத்த தலைமுறைப் போர்விமானங்கள்

அமெரிக்காவின் F-22, F-35 ஆகியவை ஐந்தாம் தலைமுறைப் போர்விமானங்கள் எனப்படுகின்றன. சீனா தனது J-20 ஐந்தாம் தலைமுறைப் போர்விமானம் என்கின்றது. இரசியாவின்  PAK/FA Sukhoi Su-57  ஐந்தாம் தலைமுறைப் போர் விமானமாகும். அமெரிக்காவின் F-35, இரசியாவின் SU-57 ஆகியவை பல தொழில்நுட்பச் சிக்கல்களை எதிர் நோக்குகின்றன. F-35 போர்விமானத்தை முதலில் போர்க்களத்தில் தாமே பாவித்தோம் என்கின்றது இஸ்ரேலியப் படைத்துறை. F-35இல் உள்ளவை மென்பொருள் சிக்கல்கள் மட்டுமே அதை இலகுவாக சீர் செய்யலாம் என்கின்றனர் அதன் உற்பத்தியாளர்கள். இரசியா தனக்கு இப்போது PAK/FA Sukhoi Su-57  போர்விமானங்கள் பெருமளவில் தேவைப்படாது எனத் தெரிவித்துள்ளது. பல நாடுகளும் இப்போது ஆறாம் தலைமுறைப் போர்விமான உற்பத்தியில் கவனம் செலுத்துகின்றன. அமெரிக்காவின் விஞ்ஞான தொழில்நுட்ப 2030 முன்னெடுப்பு (Science and Technology 2030 initiative) ஆறாம் தலைமுறைப் போர்விமான உற்பத்தியில் அதிக கவனம் செலுத்துகின்றது.

அமெரிக்காவின் புதிய F-15

இதுவரை பல போர்முனைகளில் செயற்பட்ட F-15 C/D போர்விமானங்கள் F-15X Eagle என்னும் புதிய வடிவத்தைப் பெறவிருக்கின்றது. இவை வானாதிக்கம் செய்யக் கூடிய வகையில் உருவாக்கப்படவிருக்கின்றன. வானின் போர் விமானங்களிடையே நடக்கும் சண்டையைப் பொறுத்தவரை F-15 மன்னாதி மன்னனாகக் கருதப்படுகின்றது. F-15 போர்விமானங்களிலும் பார்க்க F-15X Eagle விமானங்கள் அதிக அளவு எடைகொண்ட படைக்கலன்களைத் தாங்கிச் செல்ல வல்லன. 24 வானிலிருந்து வானுக்குத் தாக்கும் ஏவுகணைகள் அதில் பொருத்தலாம். மிகவும் புதிய உணரிகள் இவற்றில் பொருத்தப்படவிருக்கும் F-15X Eagle விமானங்களில் சிறந்த பறப்புக் கட்டுப்பாடு இருக்கும். F-15X Eagle விமானங்கள் குறைந்த பறப்புச் செலவைக் கருத்தில் கொண்டு உருவாக்கப்படுகின்றன. F-22இன் பறப்புச் செலவு மணித்தியாலத்திற்கு 35,0000டொலர்களாகும் ஆனால் F-15X Eagleஇன் பறப்புச் செலவு மணித்தியாலத்திர்கு 27,000 டொலர்கள் மட்டுமே. இதில் புலப்படாத் தொழில்நுட்பம் அதிக அளவில் இல்லை. இரசியா, சீனா போன்ற வலிமை மிக்க ரடார்களைக் கொண்ட நாடுகளுக்கு எதிராகக் களமிறக்கக் கூடியவை என்பதால் புலப்படாத் தொழில்நுட்பத்தில் அதிக கவனம் செலுத்தப்படவில்லை. வானாதிக்கத்தில் மட்டும் அதிக கவனம் செலுத்தப்பட்டுள்ளது. தீவிரவாதிகள் போன்ற வலிமையற்ற ரடார்கள், வலிமையற்ற ஏவுகணைகல் இல்லாத எதிரிகளுடன் போரிடுவதற்கு F-15 சிறந்த போர்விமானமாகும். சிரியாவிற்குள் பலதடவைகள் ஊருடுவுவதற்கு இஸ்ரேல் F-15 C/D போர்விமானங்களையே பயன்படுத்தியது. புதிய F-15X Eagle விமானங்களை இஸ்ரேல் வாங்க விருப்பம் தெரிவித்துள்ளது. F-35விமானங்கள் கத்திகளில் Swiss Army Knife போல போர்விமானங்களில் பற்பணிகள் செய்யக் கூடியவையாக விமர்சிக்கப்படுகின்றது. ஆனால் அது ஒரு இலகுதர விமானங்களாகும்.

இரசியாவின் தாங்கிப்படை

தாங்கிகள் உருவாக்கத்தில் சிறந்து விளங்கும் இரசியாவின் T-14 Armata ஒரு சுப்பர் தாங்கி எனப் பெயரெடுத்துள்ளது. 1994 டிசம்பரில் இருந்து 1996 ஓகஸ்ட் வரை இரசியா செஸ்னியாவில் 5200படையினரை இழந்ததுடன் 52,000படையினர் காயப்பட்டனர். மேலும் 3000படையினர் காணமற் போயுள்ளனர். இது இரசியாவிற்கு அதிக கவசவாகனங்களும் தாங்கிகளும் தேவை என்பதை உணர்த்துகின்றது. இரசியாவின் T-14 Armata பல வகை0களில் அமெரிக்காவின் M1A2 Abrams தாங்கிகளிலும் பார்க்கச் சிறந்தவையாகும்

லேசர்களும் ஹைப்பர் சோனிக்கும்

ஒரு காலத்தில் போர் பற்றிய கதைகளில் கற்பனையாக இருந்து வந்த லேசர் படைக்கலன்கள் தற்போது ஆய்வு கூடங்களில் பரீட்சிக்கப் படும் நிலையை எட்டியுள்ளது. லேசர் படைக்கலன்கள் directed-energy weapons என அழைக்கப்படுகின்றன. அமெரிக்கா, சீனா, இரசியா ஆகிய நாடுகள் இதில் அதிக அக்கறை காட்டி கணிசமான முன்னேற்றமடைந்துள்ளன. ஒலியிலும் பார்க்க பத்து மடங்கு வேகத்தில் பாயக் கூடிய ஏவுகணைகளை சீனாவும் இரசியாவும் உருவாக்கி வருகையில் அவற்றை எதிர் கொள்ள ஒரே வழியாக அமெரிக்கா லேசர் படைக்கலன்களை உருவாக்குகின்றது. அதே போல் சீனாவும் இரசியாவும் லேசர் படைக்கலன்களை உருவாக்குகின்றன. Directed-energy weapons என்பது high-energy laser என்றும் high-power microwave systems என்றும் இருவகைப்படும். இவை ஒளியின் வேகத்தில் சென்று இலக்குகளைத் தாக்குவதால் ஒலியிலும் பார்க்க பல மடங்கு வேகத்தில் பாயும் எவுகணைகளை இவற்றால் இலகுவாக அழிக்க முடியும். அத்துடன் மற்றப் படைக்கலனகளிலும் பார்க்க செலவு குறைந்தவையுமாகும்.

இந்தியாவில் பிரம்மாஸ்த்திரம்

இந்தியாவும் இரசியாவும் இணைந்து உருவாக்கிய BrahMos Supersonic Cruise Missile என்னும் ஏவுகணைகளை இந்திய தனது படைத்துறையின் பிரம்மாஸ்த்திரம் என்கின்றது. மகாபாரத்தில் குறிப்பிடப்படும் பிரம்மாஸ்த்திரம் போல் முழு எதிரிகளையும் நொடிப்பொழுதில் அழிக்காவிடினும் பிரம்மோஸ் ஒலியிலும் பார்க்க 7 மடங்கு வேகத்தில் பாயக்கூடியது 500கிலோ எடையுள்ள குண்டுகளைத் தாங்கிக் கொண்டு 300கிலோ மீட்டர் பாயக் கூடியது. கடல், வான், தரை ஆகிய மும்முனைகளிலும் பாவிக்கக் கூடிய வகையில் அவை வகைப்படுத்தப்பட்டுள்ளன. இப்போது இந்தியா தனது பிரம்மோஸ் ஏவுகணைகளை சிறியதாக்கியுள்ளது. உயரத்தில் மூன்று மீட்டரையும்  எடையில் அரைவாசியையும் குறைத்து புதிய என்னும் ஏவுகணையை உருவாக்கியுள்ளது. சிறிதாக்கப்படும் போது அவை அதிக வேகத்துடனும் அதிக தூரமும் பாயக்கூடியவையாக அமையும். சிறிய ஏவுகணைகள் BrahMos NG சிரிய ரக போர்விமானங்களிலும் விமானம்தாங்கிக் கப்பல்களிலும் பாவிக்கக் கூடியதாக இருக்கும். இந்தியாவின் இரசியத் தயாரிப்பு SU-30MKI போர்விமானங்களிலும் உள்நாட்டு உற்பத்தி தேஜஸ் போர்விமானங்களிலும் சிறியதாக்கப்பட்ட BrahMos NG ஏவுகணைகளைப் பாவிக்கலாம். அத்துடன் கடற்படையினரின்  torpedo எனப்படும் நீருக்குக்கீழான ஏவுகணைகளாகவும் பாவிக்க முடியும். இந்திய விமானம் தாங்கிக் கப்பல்களில் செயற்படும் MiG-29K போர்விமானங்களிலும் பாவிக்கலாம். இப்படி பல துறைகளிலும் பாவிக்கப்படுவதால் BrahMos NG ஏவுகணைகளை பெருமளவில் உற்பத்தி செய்யும் போது குறைந்த செலவில் உற்பத்தி செய்ய முடியும். இந்தியக் காலாட் படையினர் எதிரியின் கட்டளை-கட்டுப்பாட்டகத்தை அழிக்கவும் BrahMos NG ஏவுகணைகளைப் பாவிக்கலாம். அதிக MiG-29K போர்விமானங்களில் அதிக BrahMos NG ஏவுகணைகளைப் பாவிப்பதன் மூலம் இந்திய வான் படை தனது வான் ஆதிக்கத்தில் வலிமை மிக்கதாக்கலாம். இந்தியர்கள் எப்படைக்கலன்களை உருவாக்கினாலும் அது பாக்கிஸ்த்தானை எப்படிப் பாதிக்கும் எனச் சிந்திப்பது வழக்கம். பெரிய பிரம்மோஸ் பஞ்சாப் மாநிலம் வரைக்கும் பாயுமாம். சிறிய பிரம்மோஸ் தீவிரவாதிகள் நிறைந்த பாக்கிஸ்த்தானின் மேற்குப் பகுதி வரை பாயக்கூடியதாம்.

Remote Warfare என்னும் தூரப் போர்முறைமை

ஆளில்லாப் போர்விமானங்கள், இணையவெளிப் போர் ஆகியவை தூரப் போர்முறைமையை இலகுவாக்கியுள்ளன. ஆளில்லாப் போர்விமானங்கள் இலகுவாகத் தயாரிக்கக் கூடியவையாக மாறி வருகின்றன. சிரியப் போர் முனையில் பல் வேறு போராளிக் குழுக்கள் ஆளில்லாப் போர்விமானங்களை தாமே உருவாக்கிப் பயன்படுத்தி வருகின்றன. சிரியாவில் இரண்டு தடவைகள் இரசியாவின் படை நிலைகள் மீது ஆளில்லாப் போர்விமானத் தாக்குதல்கள் செய்யப்பட்டுள்ளன. ஆளில்லாப் போர்விமானங்களால் தனது படை நிலைகள் மீது தாக்குதல்கள் நடக்கலாம் என்ற கரிசனையில் அமெரிக்கா ஆளில்லாப் போர்விமான எதிர்ப்பு முறைமைகளை உருவாக்கியுள்ளது.

செயற்கை விவேகம்

போர்க்களத்தில் செயற்கை விவேகம் பரந்த அளவில் பாவிப்பதற்கான முன்னெடுப்பை பல வல்லரசுகள் செய்து கொண்டிருக்கின்றன. பொதுவாக killer robots என அழைக்கப்படும் lethal autonomous weapons systems போன்றவற்றை உருவாக்குவதில் அதிக அக்கறை காட்டப்படுகின்றது. எண்மியச் செயற்பாடுகளுக்கும் மனித உடற் செயற்பாடுகளுக்கும் இடையில் உள்ள இடைவெளிகள் குறைந்து கொண்டே போகின்றன. 2030இற்குப் பின்னர நடக்கவிருக்கும் போர்களில் செயற்கை விவேகம் கொண்ட கணினிகள்தான் ஜெனரல்களாக இருந்து போரை நடத்தும். போர்முனையில் ஆளில்லாவிமானங்களில் இருந்து தாங்கி வரை எல்லாவற்றிலும் பொருத்தப்பட்டிருக்கும் கணினிகளும் உணரிகளும் களநிலவரம் தொடர்பான தகவல்களைத் திரட்டி அந்த ஜெனரலுக்கு அனுப்ப அது இடும் கட்டளைப்படி போர் நகர்த்தப்படும். மரபு வழி நடவடிக்கைகளிலும் பார்க்க பன்மடங்கு வேகத்தில் இந்த நடவடிக்கைகள் மேற்கொள்ளப்படும். முழுக்க முழுக்க தாமாக தீர்மானம் எடுத்து எதிரியை அழிக்கக் கூடிய படைக்கலன்களும் போர் முனைகளில் செயற்படும்.

ஆறாம் படைக்கிளையாக விண்வெளிப்படை.

தற்போது தரைப்படை, கடற்படை, கடல்சார் படை(Marines), வான்படை, இணையவெளிப்படை, என இருக்கும் ஐந்து படைக் கிளைகளோடு இனி ஆறவது படைக்கிளையாக விண்வெளிப்படையும் சேர்க்கப்பட்டுக் கொண்டிருக்கின்றது. இதை A mix of scary sci-fi and futuristic optimism படைத்துறை நிபுணர்கள் என விபரிக்கின்றார்கள். ஏற்கனவே ஒரு நாட்டின் வானில் இருக்கும் அதனது செய்மதிகளை மற்ற நாடுகள் அழிக்காமல் பாதுகாப்பதும் மற்ற நாடுகளின் செய்மதிகளை செயலிழக்கச் செய்வதும் அழிப்பதும் இந்த விண்வெளிப்படையின் முக்கிய நோக்கமாக இருகும். தரையில் இருந்து செய்மதிகளை நோக்கி வீசப்படும் ஏவுகணைகளை இடைமறித்து அழிப்பது முக்கிய செயற்பாடாக இருக்கும். அமெரிக்காவின் நாசாவும் வான்படையும் இணைந்து கடந்த ஐம்பது ஆண்டுகளாக இது தொடர்பாக தொடர் ஆய்வில் ஈடுபட்டு வருகின்றன. பராக் ஒபாமாவிற்கு ஆளில்லா விமானங்கள் பிடித்திருந்ததைப் போல டொனால்ட் டிர்மப்பிற்கு விண்வெளிப்படை பிடித்திருக்கின்றது. இதனால் இத்துறைக்கான நிதி ஒதுக்கீடு இலகுவாகக் கிடைக்கின்றது. விண்வெளிப்படை ஒரு தனிப்பட்ட படைக்கிளையாக இல்லாமல் வான்படையின் ஒரு பகுதியாக இருக்கலாம் என பெண்டகனில் சிலர் கருதுகின்றனர்.

சீனா தொழில்நுட்பங்களை வாங்குவதைத் தடுத்தல்

சீன நிறுவங்கள் அமெரிக்க உயர் தொழில்நுட்ப நிறுவனங்கலை விலை கொடுத்து வாங்குவதன் மூலம் அமெரிக்கா உருவாக்கிய தொழில்நுட்பங்களைப் பெற்று வந்தது. இப்போது டொனால்ட் டிரம்ப் அதைப் பலவகைகளில் தடுத்துள்ளார். ஜேர்மனியும் இப்போது அதைச் செய்கின்றது. இதுவரை காலமும் சீன முதலீடுகளை ஊக்குவித்த ஜேர்மனி இப்போது ஜேர்மனிய உற்பத்தி நிறுவனமொன்றை சீனா வாங்குவதித் தடை செய்துள்ளது. Leifeld Metal Spinning என்னும் இயந்திர உபகரணங்களை உற்பத்தி செய்யும் நிறுவனம். மிகவும் உறுதியான உலோக உதிரிப் பாகங்களை அது உற்பத்தி செய்கின்றது. அவை வாகன மற்றும் வானூர்தி உற்பத்தியில் பயன்படுத்தப்படும். 2016-ம் ஆண்டு Kuka என்னும் இயந்திர மனிதர்களை உற்பத்தி செய்யும் நிறுவனத்தை சீனா 4.5 பில்லியன் யூரோக்களுக்கு வாங்கியது. இப்படிப் பல ஜேர்மன் உயர் தொழில்நுட்ப நிறுவனங்களை சீனா வாங்கிக் கொண்டிருந்தது. தற்போது அமெரிக்காவின் பாதையைப் பின்பற்றி ஜேர்மனியும் சீனா தனது நாட்டில் உள்ள உயர் தொழில்நுட்ப நிறுவனங்களை வாங்குவதைத் தடை செய்கின்றது.

தொழில்நுட்பங்களின் வளர்ச்சி படைத்துறையை மேம்படுத்தி போரியலை மேலும் அழிவுப் பாதையில் இட்டுச் செல்கின்றது.

ஒஸ்ரேலிய ஊடகம் ஒன்று அமெரிக்கா ஈரான் மீது ஓகஸ்ட் மாத ஆரம்பத்தில் போர் தொடுக்கும் எனத் தெரிவித்தது. ஒஸ்ரேலியா ஐந்து கண்கள் என்னும் உளவுத்துறை அமைப்பின் ஓர் உறுப்பு நாடாகும். அதில் உள்ள மற்ற நாடுகள் அமெரிக்கா, ஐக்கிய இராச்சியம், நியூசீலாந்து, கனடா ஆகியவையாகும். அமெரிக்கா ஈரானுக்கு எதிரான தாக்குதல் செய்தால் தாக்குதல் செய்யப்படவேண்டிய இடங்களை இனம் காணும் பணியில் ஒஸ்ரேலியா முக்கிய பங்கு வகிக்கும். அந்த அடிப்படையில் ஒஸ்ரேலியாவிற்கு ஈரான் தொடர்பான படை நடவடிக்கைகள் பற்றி முன் கூட்டியே தகவல் அறியும் வாய்ப்பு அதிகம். அதை அந்த ஒஸ்ரேலிய ஊடகம் வேவு பார்த்து அறிந்திருக்கலாம். ஆனால் அப்படி ஒரு தாக்குதல் நடத்தும் எண்ணம் தமக்கு இல்லை என்கின்றார் அமெரிக்காவின் பாதுகாப்புத் துறைச் செயலர் ஜேம்ஸ் மத்தீஸ்.

அமெரிக்கா ஒழிய வேண்டும்

தற்போது ஆட்சியில் இருக்கும் மதவாதிகள் 1979 ஈரானில் மதவாதப் புரட்சி ஆரம்பித்ததில் இருந்தே தமது ஆட்சியை கவிழ்க்க அமெரிக்கா சதி செய்வதாக உறுதியாக நம்புகின்றனர். அமெரிக்கா அழிய வேண்டும் என்பது அவர்களின் பிரதான சுலோகம். மேற்காசியாவில் இருக்கும் அமெரிக்கப் படைத்தளங்கள் யாவும் ஈரானிய மதவாத ஆட்சியை ஒழிக்கவே இருக்கின்றன எனவும் ஈரானிய மதவாத ஆட்சியாளர்கள் நம்புகின்றனர். பராக் ஒபாமா தமக்கு ஈரானில் ஆட்சி மாற்றம் ஏற்படுத்தும் நோக்கம் இல்லை என ஈரானிய மதவாதிகளுக்கு உணர்த்த எடுத்த முயற்ச்சிகள் தோல்வியில் முடிவடைந்தது. ஈரானியர்கள் அமெரிக்காவை நம்பாமல் இருக்க டொனால்ட் டிரம்ப் தான் ஈரானை நம்பமாட்டேன் அது அணுக்குண்டு உற்பத்தியை நிறுத்தவில்லை என்றார்.

ஈரானின் போர்ப்பயிற்ச்சி

2018 ஓகஸ்ட் 5-ம் திகதி ஞாயிற்றுக் கிழமை கடந்த சில நாட்களாக தாம் ஹோமஸ் நீரிணையில் செய்த போர்ப்பயிற்ச்சி முடிவிற்கு வந்ததாக ஈரான் அறிவித்துள்ளது. பன்னாட்டுக் கடற் போக்குவரத்தைப் பாது காக்கும் நோக்கத்துடன் தமது படையினர் பயிற்ச்சியில் ஈடுபட்டதாக ஈரான் அறிவித்தது.

ஈரானுடன் போர் தவிர்க்க முடியாததா?

1979-ம் ஆண்டு நடந்த ஈரானிய மதவாதப் புரட்சியில் இருந்தே அமெரிக்காவுடன் ஒரு மோதல் நிலையை ஈரானிய மதவாத ஆட்சியாளர்கள் உருவாக்கியிருந்தார்கள். 2015-ம் ஆண்டு ஈரானியப் புரட்சி மற்ற இஸ்லாமிய நாடுகளுக்கும் பரப்பப்படும் என ஈரானியப் படைத்துறை பகிரங்கமாக அறிவித்தது. இஸ்ரேல் என்ற ஒரு நாடு இருக்கக் கூடாது என்பதில் ஈரான் என்றும் உறுதியாக இருக்கின்றது. சிரியப் போரில் ஈரான் தன்னை ஒரு பிராந்திய வல்லரசாகக் காட்ட முயன்றது. சிரியா, ஈராக், லெபனான், யேமன், லிபியா ஆகிய நாடுகளில் ஈரான் தன் ஆதிக்கத்தை அல்லது ஆதிக்க ஆவலை வெளிப்படுத்திக் கொண்டிருக்கின்றது. மேற்காசியாவிலும் வட ஆபிரிக்காவிலும் ஒரு புதிய வல்லரசாக ஈரான் உருவெடுக்க முயல்கின்றது. Thucydides’s Trap தத்துவப்படி ஒரு புதிய வல்லரசு உருவாகும் போது ஏற்கனவே இருக்கும் வல்லரசுடன் போர் என்பது தவிர்க்க முடியாததாகும்.

வார்த்தைப் போர் தொடங்கி விட்டது

ஏற்கனவே டொனால்ட் டிரம்பிற்கும் ஈரானில் ஆட்சியில் உள்ளவர்களுக்கும் டுவிட்டர் மூலம் போர் ஆரம்பித்துள்ளது. அமெரிக்காவுடன் போர் நடந்தால் அது எல்லாப் போர்களின் தாய்ப் போராக அமையும் என உரையாற்றினார் ஈரானிய அதிபர் ஹஸன் ரௌஹானி. அதற்குப் பதிலடியாக டிரம்ப் இனி எப்போதும் அமெரிக்காவை மிரட்ட முயல வேண்டாம் அப்படி மிரட்டினால் அமெரிக்கா செய்யும் தாக்குதல் உலக வரலாற்றில் சிலர் மட்டும் பார்த்த மோசமான தாக்குதலாக இருக்கும் என்றார். ஈரானின் கட்ஸ் படையின் தளபதி காசிம் சொலெய்மனி அமெரிக்கா போரைத் தொடக்கலாம் ஆனால் போரை எப்படி முடிப்பது என்பதை நாம்தான் தீர்மானிப்போம் என்றார். ஈரானிய வெளியுறவுத் துறை அமைச்சர் ஈரானின் ஒவ்வொரு பேரரசுகளின் வரலாற்றுக் காலம் அமெரிக்காவினது முழு வரலாற்றுக் காலங்களிலும் நீண்டது எங்களை எவராலும் அழிக்க முடியாது என்றார். ஆனால் ஒரு வாரத்துக்குள் டிரம்ப் ஈரானிய அதிபரை தான் சந்திக்கத் தயார். அதுவும் நிபந்தனை இன்றிய சந்திப்பு என்கின்றார். நடக்கும் நகர்வுகளைப் பார்த்தால் கிட்டத்தட்ட வட கொரியாவிற்கு எதிரான போர்க் கூச்சல் போல இருக்கின்றது.

வட கொரியா வேறு ஈரான் வேறு

கொரியாவிற்கு எதிரான அமெரிக்க நிலைப்பாட்டிற்கும் ஈரானிற்கு எதிரான அமெரிக்க நிலைப்பாட்டிற்கும் இடையில் இரு பெரும் வித்தியாசங்கள் உள்ளன. முதலாவது வட கொரியாவால் இஸ்ரேலுக்கு அச்சுறுத்தல் இல்லை. ஈரானால் இஸ்ரேலுக்குப் பெரும் அச்சுறுத்தல் உண்டு. இரண்டாவது வட கொரியாவால் அமெரிக்காவிற்கு அச்சுறுத்தல் உள்ளது. ஈரானால் அமெரிக்காவிற்கான நேரடி அச்சுறுத்தல் கரிசனைக்கு உரியதல்ல. ஆனால் உலக எரிபொருள் போக்கு வரத்திற்கு ஈரானால் பெரும் அச்சுறுத்தல் விடுக்க முடியும். வட கொரியாவில் தனி ஒருவர் முடிவுகளை எடுக்க முடியும். ஈரானில் பல அதிகார மையங்கள் உண்டு. வேறுபட்ட சிந்தனை கொண்டவர்கள் உண்டு. டிரம்ப்பின் பேச்சு வார்த்தை அழைப்பும் போர் அறை கூவலும் அங்கு உள் முறுகலைக் கூட உருவாக்கலாம். அப்படி ஓர் உள் முறுகலை உருவாக்கும் சதிதான் அமெரிக்க அதிபரில் போர் மிரட்டலாக இருக்கவும் கருதலாம். ஏற்கனவே ஈரானில் பல உள்நாட்டு கிளர்ச்சிகள் உருவாகியுள்ளன அல்லது வெளி வலுக்களால் உருவாக்கப்பட்டுள்ளன.

ரௌஹானிக்கு கடிதம் எழுதிய படைத் தளபதி

2018 ஜூலை மாத இறுதியில் ஈரானின் என்ற படைத்துறையின் கட்டளை அதிகாரி மொஹமட் அலி ஜஃபாரி ஈரானிய அதிபர் ஹசன் ரௌஹானிக்கு ஒரு கடிதத்தை எழுதியுள்ளார். அதில் அதிபர் எதிரிகளையிட்டுக் கவலைப்படுவதிலும் பார்க்க பொருளாதாரத்தில் அதிக கவனம் செலுத்த வேண்டுமென்று குறிப்பிட்டிருந்தார். ஈரான் பெரிய சாத்தானாகிய அமெரிக்காவுடன் பேச்சு வார்த்தை நடத்தக் கூடாது என்பது அவரது கருத்தாக கடிதத்தில் இருந்தது. ஈரானியர்கள் அமெரிக்காவை மிரட்டல்கார நாடகப் பார்க்கின்றனர். ஈரானின் மோசமடையும் பொருளாதாரம் மக்கள் மீது பல சுமைகளைச் சுமத்துகின்றது. அதனால் பல நகரங்களில் மக்கள் தொடர் ஆர்ப்பாட்டங்களில் ஈடுபட்டு வருகின்றனர். அதிபர் ரௌஹானிக்கு உயர் மத குருக்கள் ஒன்று கூடி எழுதிய கடிதத்தில் ஊழலை ஒழிக்கும்படி வேண்டு கோள் விடுத்துள்ளனர். ஈரானின் பொருளாதாரம் மோசமடைந்தமைக்கு அமெரிக்காவின் பொருளாதாரத் தடை காரணமல்ல எனக் காட்ட ஈரானிய மதவாதிகள் முயல்கின்றனர்.

பொருளாதாரப் போரும் ஆரம்பித்து விட்டது

ஏற்கனவே அமெரிக்கா ஈரானுக்கு எதிராக பல பொருளாதார நகர்வுகளை மேற்கொண்டுள்ளது.

எரிபொருள் தடை: எல்லா நாடுகளையும் ஈரானிடமிருந்து எரிபொருள் வாங்கக் கூடாது என அறிவுறுத்தப்பட்டுள்ளது.

சீனாவைத் தவிர மற்றப் பல நாடுகள் ஈரானிடமிருந்து எரிபொருள் வாங்குவதைக் குறைக்கத் தொடங்கியுள்ளன.

வர்த்தகத் தடை: ஐரோப்பிய நிறுவனங்களையும் நிதி நிறுவனங்களையும் ஈரானுடனான வர்த்தகத்தை நிறுத்தும் படி அமெரிக்கா அறிவுறுத்தியுள்ளது. இதை மீறும் நிறுவனங்கள் மீது அமெரிக்கா பொருளாதாரத் தடை விதிக்கும் எனவும் மிரட்டப்பட்டுள்ளது.

அரசுறவியல் நகர்வுகள்: புட்டீனுடனான டிரம்பின் பேச்சு வார்த்தையின் போது ஈரான் விவகாரம் விவாதிக்கப்பட்டது. இஸ்ரேலுக்கும் இரசியாவிற்கும் இடையில் முன்பு எப்போதும் இல்லாத அளவு ஒத்துழைப்பு தற்போது நிலவுகின்றது. இஸ்ரேலுக்கு அண்மையாக ஈரானியப் படைகள் இருக்கக் கூடாது என்பதை இரசியா பகிரங்கமாக ஆதரிக்கின்றது.

ஈரானுக்கு எதிரான பொருளாதாரத் தடைகளால் ஈரானியர்கள் தமது சொத்துக்களின் மதிப்பில் பாதியை இழந்து விட்டார்கள். 2018 ஜூலின் ஈரானிய அரசு வெளிநாடுகளில் இருந்து இறக்குமதி செய்யும் 1300 பொருட்களுக்குத் தடை விதித்தது. அமெரிக்காவின் பொருளாதாரத் தடைகளை இரசியாவும் சீனாவும் ஏற்றுக் கொள்ளவில்லை. அமெரிகாவின் தனக்கு எதிராக எடுக்கும் நடவடிக்கைக்களைத் தவிர்க்க பிரெஞ்சு எரிபொருள் நிறுவனமான டோட்டல் ஈரானில் செய்ய விருந்த 47மில்லியன் டொலர்கள் பெறுமதியான முதலீட்டை நிறுத்தவுள்ளது, 2018இல் ஈரானியப் பொருளாதாரம் 1.8 விழுக்காடு மட்டும் வளரும் என மதிப்பிடப்பட்டுள்ளது. முன்பு அது 4.3 விழுக்காடு வளரும் என எதிர்பார்க்கப்பட்டது.

ஈரான் ஜேமனியில் இருந்து இறக்குமதி செய்யப்பட்ட அச்சு இயந்திரங்கள் மற்றும் காகிதங்களைக் கொண்டு யேமன் நாணயத்தைப் போல போலி நாணயங்களை அச்சிட்டு அதை தனக்கு ஆதரவான யேமன் கிளர்ச்சிக்காரர்களுக்கு விநியோகித்ததை அமெரிக்க உளவுத்துறை அறிந்து ஈரானுக்கு அது போன்ற இயந்திரங்களை ஜேர்மனி விற்காமல் நிறுத்தியுள்ளது. மேற்கு ஐரோப்பிய நாடுகளில் ஈரானிய ஆட்சியாளர்களுக்கு எதிராகச் செயற்படும் ஈரானியர்கள் நடத்திய மாநாட்டில் ஈரானிய உளவாளிகள் குண்டு வெடிக்கச் செய்ய எடுத்த முயற்ச்சி முறியடிக்கப்பட்டுள்ளது. இஸ்ரேலிய உளவுத்துறையான மொசாட் ஈரானிய உளவாளிகள் பற்றிய தகவல்களை பல் வேறு நாடுகளின் அரசுகளுக்கு வழங்கிவருகின்றது.

அமெரிக்காவுடன் யார் இணைவார்கள்

தற்போதைய பிரித்தானியப் பாராளமன்றத்தில் ஈரானுக்கு எதிராக போர் தொடுக்க வேண்டுமா என்ற பிரேரணை தோற்கடிக்கப்படலாம். பிரித்தானியா ஒரு போரில் ஈடுபட முடியாதவாறு பிரித்தானியா ஐரோப்பிய ஒன்றியத்தில் இருந்து வெளியேறும் பிரச்சனை முற்றிப் போய் உள்ளது. பிரித்தானியா, ஒஸ்ரேலியா, உட்படப் பல நாடுகள் ஈரானுக்கு எதிரான தாக்குதலில் அமெரிக்காவிற்கு உதவியாகச் செயற்படலாம். இஸ்ரேல் நேரடியாகப் போரிடுமா அல்லது மறைமுகமாகப் போரிடுமா என்பதுதான் கேள்வி. போர் இஸ்ரேலுக்கானது. உலகெங்கும் உள்ள யூத செல்வந்தர்களின் செயற்பாடுதான் ஈரானுடனான யுரேனியப் பதப்படுத்தல் ஒப்பந்தத்தில் இருந்து அமெரிக்காவை ஒரு தலைப்பட்சமாக விலகச் செய்தது.  சவுதி அரேபியாவின் பணமும் களத்தில் இறங்கலாம். மேற்கு ஐரோப்பிய நாடுகள் ஈரானுடனான யுரேனிய ஒப்பந்தத்தில் இருந்து விலகாத படியால் அவை ஈரானுக்கு எதிரான போரில் இறங்க வாய்ப்பில்லை. ஏற்கனவே ஈரானுக்கு எதிரான நேட்டோ என அழைக்கப்படும் The Middle East Strategic Alliance (MESA) படைத்துறைக் கூட்டமைப்பை பாஹ்ரேன், குவைத், ஓமான், காட்டார், சவுதி அரேபியா, ஜோர்தான், எகிப்து ஆகிய நாடுகளை இணைத்து அமெரிக்கா உருவாக்கும் எண்ணத்தை முன்வைத்துள்ளது. இவை ஈரானை எதிர் கொள்ள என இணைக்கப்பட்டவை.

படைத்துறை ஒப்பீடு

அமெரிக்கா தனது மொத்தத் தேசிய உற்பத்தியின் 2.4 விழுக்காட்டைப் பாதுகாப்பிற்கு ஒதுக்கியுள்ளது. அதன் பாதுகாப்புச் செலவு ஆண்டொன்றிற்கு 664பில்லியன் டொலர்கள். ஈரான் தனது மொத்தத் தேசிய உற்பத்தியின் 6 விழுக்காட்டை பாதுபாப்பிற்கு செலவு செய்தாலும் அதன் பாதுகாப்புச் செலவு 17.1பில்லியன் டொலர்கள் மட்டுமே. அமெரிக்காவின் செலவு வெறும் பாதுகாப்புச் செலவல்ல அதன் உலக ஆதிக்கத்திற்கான செலவாகும். ஐக்கிய அமெரிக்காவின் செயற்படும் படையினரின் எண்ணிக்கை 1.4மில்லியன். ஈரானின் படையினரின் எண்ணிக்கை 545,000. அமெரிக்காவிற்கும் ஈரானிற்கும் இடையில் போர் நடக்கும் போது ஈரானால் மொத்த 545000 படையினரையும் அமெரிக்காவிற்கு எதிராகப் போர் புரிய வைக்க முடியும். அமெரிக்காவால் தன் மொத்தப் படையினரையும் ஈரானில் களமிறக்க முடியாது. போர் விமானங்கள் என்று பார்க்கும் போது அமெரிக்காவின் 13444 விமானங்களின் எண்ணிக்கைக்கும் செயற்திறனுக்கும் ஈரானின் 479 விமானங்கள் மலையும் மடுவும் போன்றன. ஆனால் ஈரானின் கடற்கலன்கள் எண்ணிக்கை அடிப்படையின் அமெரிக்காவிற்கு அண்மையில் நின்றாலும் சுடு திறனில் பாரிய வேறுபாடு உண்டு. அமெரிக்காவிடம் 5100 அணுக்குண்டுகள் உள்ளன. ஈரானிடம் ஏதும் இல்லை. அமெரிக்காவிடம் 8800 தாங்கிகலும் ஈரானிடம் 1700 தாங்கிகளும் உள்ளன. ஈரனிலும் பார்க்க 30 மடங்கு கவச வாகனங்கள் அமெரிக்காவிடம் உள்ளன.

அனுபவமும் அர்ப்பணிப்பும்

அமெரிக்கா தனது வரலாற்றின் 93விழுக்காடு போரில் ஈடுபட்டு வருகின்றது. உலகின் பல பகுதிகளில் பல்வேறு படையினருடன் போர் செய்த அனுபவம் உள்ளவர்கள். ஆனால் ஈரானியப் படையினரால் அர்ப்பணிப்புடன் போர் புரிய முடியும் என்பதை அவர்கள் ஈராக்குடனான போரின் போது நிரூபித்துள்ளனர். கடந்த நூறு ஆண்டுகளாக ஈரான் எந்த ஒரு நாட்டையும் ஆக்கிரமிக்கவில்லை. அது சமாதானத்தை விரும்பும் ஒரு நாடாகவே இருக்கின்றது. ஈரானில் உள்ள மதவாத ஆட்சியை காப்பாற்ற ஈரானிய மதகுருக்கள் முன்னின்று செயற்படுவர். அவர்களால் ஈரானிய மக்களையும் மட்டுமல்ல உலகெங்கும் வாழும் இஸ்லாமியர்களையும் அமெரிக்காவிற்கு எதிராகக் கிளர்ந்து எழும்பச் செய முடியும்.

 

அபரிமிதமான அமெரிக்கப் படைவலு

ஈரானுக்கு எதிராக உலகில் பல போர் முனைகளில் சிறந்த விமானம் என ஏற்றுக் கொள்ளப்பட்ட ஐந்தாம் தலைமுறைப் போர் விமானமான F-22வில் பலவற்றை அமெரிக்கா களத்தில் இறக்கும். அத்துடன் எந்தப் போர்களத்திலும் பரீட்சிக்கப்படாத F-35 போர் விமானங்களையும் அமெரிக்கா களத்தில் இறக்கலாம். ஈரானால் களத்தில் இறக்கக்கூடிய மிக வலிமையுடைய போர் விமானங்கள் Mig-29, SU-24 ஆகிய இரசியத் தயாரிப்பு விமானங்களாகும். பாஹ்ரேனில் நிலை கொண்டுள்ள அமெரிக்காவின் ஐந்தாவது கடற்படைப் பிரிவில் உள்ள அணுவலுவில் இயங்கும் நிமிட்ஸ் வகை விமானம் தாங்கிக் கப்பல் உட்பட பலவிதமான கடற்படைக் கலன்களை ஈரானுக்கு எதிராக அமெரிக்காவால் களமிறக்க முடியும். 333 மீட்டர் நீளமான இந்த விமானம் தாங்கிக் கப்பலில் 60 போர் விமானங்கள் உள்ளன. அவற்றில் பெரும்பாலானவை F-18 போர் விமானங்களாகும். ஒரேயடியாகப் பல அணுக்குண்டுகளை தாங்கிச் சென்று வீசக் கூடிய Multiple independently targetable reentry vehicleஎன்னும் ஏவுகணைகள் ஈரானை நிர்மூலம் செய்யக் கூடியவை. மேலும் அமெரிக்காவின் அணுவலுவில் இயங்கும் ஒஹியோ வகை நீர்மூழ்கிக் கப்பல்களை எதிர்கொள்ளக் கூடிய நிலையில் ஈரான் இல்லை எனச் சொல்லலாம்.

உலகெங்கும் வாழும் யூதப் பெரும் செல்வந்தர்கள் ஈரானை அடக்குவதற்கு முன்னின்று உழைக்கின்றார்கள். அவர்களால் இரசியர்களை ஈரானுக்கு ஆதரவு கொடுக்காமற் செய்ய முடியும். சீனா ஈரானுக்கு மறைமுகப் பின்புல ஆதரவை மட்டுமே கொடுக்க முடியும். தனிமப் படுத்தப்பட்ட ஈரான் சில கொள்கை மாற்றங்களைச் செய்து போரைத் தவிர்க்கலாம்.

அமெரிக்கா சீனாவிற்கு எதிராகத் தொடுத்துள்ள வர்த்தகப் போரால் பாதிக்கப் பட்ட அமெரிக்க விவசாயிகளுக்கு அமெரிக்க அரசு 12 பில்லியன் டொலர்களை நிவாரணமாக வழங்க முடிவு செய்துள்ளது. அடிச்ச கைப்புள்ளைக்கே இந்தளவு காயம் என்றால் அடிவாங்கியவனின் கதி? 2017-ம் ஆண்டு அமெரிக்காவிற்கு சீனா செய்த ஏற்றுமதி 506 பில்லியன் டொலர்கள் பெறுமதியாதகாவும் அமெரிக்காவிலிருந்து செய்த இறக்குமதி 130பில்லியன் டொலர்கள் பெறுமதியானதாகவும் இருந்தது. சீனாவுடனான இந்த பெரும் பற்றாக்குறை தொடர்ந்து அதிகரித்துக் கொண்டே செல்கின்றது. இதைச் சீர் செய்ய கடந்த காலங்களில் அமெரிக்கா எடுத்த முயற்ச்சிகள் சரிவராத நிலையில் அமெரிக்க அதிபர் டொனால்ட் டிரம்ப் தான் சீனாவிலிருந்து இறக்குமதி செய்யப்படும் பல பொருட்கள் மீதான சுங்க வரியை அதிகரித்தார். இதற்குப் பதிலடியாக சீனாவும் அமெரிக்காவில் இருந்து இறக்குமதி செய்யப்படும் பொருகளுக்கு வரி விதித்தது. இதனால் இரு நாடுகளுக்கும் இடையிலான வர்த்தகப் போர் ஆரம்பித்தது. தனது பொருட்களுக்கு அமெரிக்கர்கள் அதிக விலை கொடுப்பதைத் தவிர்க்க சீனா தனது நாணய்த்தின் பெறுமதியைக் குறைத்தது. அதற்குப் போட்டியாக அமெரிக்காவும் தனது நாணயத்தின் பெறுமதியைக் குறைத்தால் அது நாணயப் போராக உருவெடுக்கும். இப்படியிருக்கையில் அமெரிக்க நடுவண் வங்கியான பெடரல் ரிசேர்வ் அமெரிக்காவின் வட்டி விழுக்காட்டை அதிகரித்தது அமெரிக்க அதிபரை ஆத்திரப்படுத்தியுள்ளது. அமெரிக்காவின் வட்டி விழுக்காடு அதிகர்க்கும் போது அமெரிக்க நாணயமான டொலரின் பெறுமதி அதிகரிக்கும். இதனால் உலகெங்கும் இருந்து இறக்குமதி செய்யப்படும் பொருட்களுக்கு குறைந்த விலை கொடுக்க வேண்டிய நிலை உருவாகும். இது சீனாவிற்கு வாய்ப்பாக அமையும். இதனால் அமெரிக்க மரபை மீறி அமெரிக்க நடுவண் வங்கியின் ஆளுநரைத் தாக்கி டிரம்ப் தனது டுவிட்டரில் பதிவிட்டார்.

நாணயப் போர் என்றால் என்ன?

ஒரு நாடு மற்ற நாடுகளில் தனது உற்பத்திப் பொருட்களை மலிவு விலையில் சந்தைப் படுத்துவதற்காக தனது நாட்டின் நாணயத்தை மற்றைய நாடுகளின் நாணயத்தினுடன் ஒப்பீட்டளவில் மதிப்பைக் குறைத்து வைத்திருக்க விரும்புகிறது. இந்த சொந்த நாணய மதிப்புக் குறைப்பை பல நாடுகள் போட்டி போட்டுக்கொண்டு செய்யும் போது நாணயப் போர் உருவாகிறது.

பிரச்சனையின் வரலாறு

2008-ம் ஆண்டு உருவான உலகப் பொருளாதாரப் பின்னடைவும் நிதி நெருக்கடியும் அதைத் தொடர்ந்து 2011இல் உருவான ஐரோப்பிய கடன் நெருக்கடியும் இரு தப்பான சொத்து வகைகளால் உருவானவையாகும் வங்கிகளுக்கு இடையிலான குறுங்கால கடன்கள் உலக நிதி முறைமையின் இரத்தோட்டமாகும். வங்கிகளின் ஈட்டுக்கடன்களை நிதி ஆவணங்களாக நிதிச் சந்தையில் பல வங்கிகள் வாங்கியமை உலக நிதி நெருக்கடியின் ஆரம்பப் புள்ளியாக அமைந்தது. பெரும்பாலான ஈட்டுக்கடன்கள் மீளளிக்க முடியாதவையாக இருந்தபடியால் அந்த ஆவணங்கள் பெறுமதியற்றவையாகும். இது வங்கிகளின் அறவிட முடியாக் கடன்களை அதிகரித்தது. இதனால் வங்கிகளின் நிதிக் கையிருப்பு பாதிக்கப்பட்டு வங்கிகளுக்கு இடையிலான குறுங்காலக் கடன் நடவடிக்கைகள் பாதிக்கப்பட்டன. இதில் பெரும் பகுதி அமெரிக்காவில் நடந்தது. வங்கிகளிடையேயான கடன் நடவடிக்கைக்களை அதிகரிக்க அமெரிக்கத் திறைசேரி பிரச்சனைக்குரிய சொத்து நிவாரண நிகழ்ச்சித்திட்டத்தை Troubled Asset Relief Program (TARP),  அறிமுகம் செய்தது. இதனால் தனியார் கடன்களை திறைசேரி தன் தலையில் தாங்கிக் கொண்டது. இதனால் தனியார் துறைக் கடன் நெருக்கடி அரச கடன் நெருக்கடியானது. 2011-ஆண்டு உருவான நிதி நெருக்கடி ஐரோப்பிய ஒன்றியத்தில் உள்ள நாடுகளில் 17 நாடுகள் இணைந்திருந்த யூரோ வலய நாடுகளிடையே உருவானது. யூரோவைப் பொது நாணயங்களாகக் கொண்ட இந்த நாடுகளில் பல முக்கியமாக கிரேக்கம், ஸ்பெயின், இத்தாலி நாடுகள், ஜேர்மனியின் பொருளாதாரத்திற்கு ஏற்ப உருவாக்கப்பட்ட நிதிக்கொள்கையால் பெரிதும் பாதிக்கப்பட்டன. 2008-ம் ஆண்டு ஏற்பட்ட பொருளாதார நெருக்கடியால் இந்த நாடுகளின் அரசுகளின் வரி வருமானம் குறைந்தன. அரசு அளவிற்கு மிஞ்சிக் கடன் பெறவேண்டிய நிலைமை உருவானது. இந்த அரச கடன் நெருக்கடி உலகின் பல்வேறு நாடுகளுக்குப் பரவின. உலக நிதி நெருக்கடி 2011இல் உருவானது. G-20 நாடுகள் பல கூட்டங்களை நடத்தில் உலக நிதி நெருக்கடி மோசமடையாமல் பார்த்துக் கொண்டன. 2011-ம் ஆண்டு ஏற்பட்ட உலக நெருக்கடியின் பின்னர் உலகில் அதிக வர்த்தகம் செய்யும் நாடாக சீனா உருவெடுத்து அமெரிக்காவை இரண்டாம் இடத்திற்கு தள்ளியது. 2014-ம் ஆண்டு பொருளியல் வாங்கும் திறன் சமநிலை (purchasing power parity) அடிப்படையில் உலகிலேயே மிகப்பெரிய பொருளாதாரமாக சீனா உருவாகியது.

ஆரம்பப்புள்ளி பொறாமை

2015-ம் ஆண்டு பல நாடுகள் 2008-ம் ஆண்டு உருவான பொருளாதார நெருக்கடியில் இருந்தும் 2011-ம் ஆண்டு நிதி நெருக்கடியில் இருந்தும் விடுபட்டுவிட்டன. இதனால் G-20 உருவாக்கிய நாடுகளிடையேயான ஒத்துழைப்பு பல நாடுகளுக்கு அவசியமற்ற ஒன்றாகி விட்டது. சீனா அமெரிக்காவிலும் பார்க்க பொருளாதாரத்தில் மேம்பட்டுச் செல்வது பல அமெரிக்க அரசியல்வாதிகளையும் பெரும் செல்வந்தர்களையும் சிந்திக்க வைத்தது. அதன் விளைவாக அமெரிக்காவை முதன்மையானது என்ற கொள்கையைக் கொண்ட டொனால்ட் டிரம்ப் 2016-ம் ஆண்டு நவம்பரில் நடந்த அமெரிக்க அதிபர் தேர்தலில் வெற்றி பெற்றார். அவர் நாடுகளிடையிலேயான ஒத்துழைப்பின் அவசியத்தைப் புறம் தள்ளி விட்டு வர்த்தகப் போரை ஆரம்பித்தார். 2018 ஜூன் மாதம் சீனாவின் வெளிநாட்டுச் செலவாணிக் கையிருப்பு 1.51 பில்லியன் டொலர்களால் அதிகரித்து 3.112 ரில்லியன் டொலர்களானது.

 

சண்டை என்றால் எல்லோர் சட்டையும் கிழியும்

அரச தூண்டுதல்களால் வளர்ச்சியடைந்து கொண்டிருக்கும் சீனப் பொருளாதாரமும் பல உள் பிரச்சனைகளை எதிர் கொள்கின்றது. 2017-ம் ஆண்டு சீனாவின் பொருளாதார வளர்ச்சி 6.7 விழுக்காடு என சீன ஆட்சியாளர்கள் சொன்னாலும் உலக வங்கியின் மதிப்பீட்டின் படி அது 1.1 விழுக்காடு மட்டுமே. டிரம்பின் வர்த்தகப் போர் சீனாவின் பொருளாதார வளர்ச்சியை பாதிக்கும். அதைத் தவிர்க்க சீனா தனது பொருளாதாரத்தினுள் 100பில்லியன் டொலர்கள் பெறுமதியான பணத்தை உட் செலுத்தவுள்ளது. அது நாணயப் புழக்கத்தை அதிகரித்து நாணயத்தின் மதிப்பைக் குறைக்கும். இதை அமெரிக்கா சீனா திட்டமிட்டு தன் நாணயத்தின் மதிப்பைக் குறைக்கும் நாணயப் போர் நடவடிக்கை எனப் பார்க்கின்றது. அமெரிக்காவும் சீனாவும் ஒன்றுக்கு ஒன்று போட்டியாகச் செய்யும் இறக்குமதி மீதான வரி அதிகரிப்பால் இரு நாடுகளினதும் பொருளாதார வளர்ச்சி 0.1 விழுக்காடு முதல் 0.2 விழுக்காடு வரையில் குறையலாம் என மதிப்பிடப்பட்டுள்ளது. பிரித்தானிய நடுவண் வங்கியின் மதிப்பீட்டின்படி உலகப் பொருளாதார வளர்ச்சியில் 2.5விழுக்காடு குறைவும் பிரித்தானியப் பொருளாதாரத்தில் 2 விழுக்காடு குறைவும் ஏற்படும். பெருமளவு பாதிப்பு அமெரிக்காவிற்கே ஏற்படும் என அந்த நடுவண் வங்கி மதிப்பிடுகின்றது. அமெரிக்காவின் பொருளாதார வளர்ச்சி 5விழுக்காட்டால் வீழ்ச்சியடையும்.

அமெரிக்க விட்டதை சீனா பிடிக்கின்றது.

ஆபிரிக்க நாடுகளுடனான சீனாவின் வர்த்தகம் அமெரிக்காவுடனான ஆபிரிக்க நாடுகளின் வர்த்தகத்திலும் அதிகமானது.  1978-ம் ஆண்டு சீனா ஆபிரிக்க நாடுகளுடன் செய்த வர்த்தகம் 765 மில்லியன் டொலர்களாக இருந்தது. 2017-ம் ஆண்டு அது 170 பில்லியன் டொலர்களாக அதிகரித்தது. தென் ஆபிரிக்காவில் நடந்த பிரேசில், , இரசியா, இந்தியா, சீனா, தென் ஆபிரிக்கா ஆகிய நாடுகளைக் கொண்ட பிரிக்ஸ் அமைப்பின் மாநாட்டுக்குச் செல்லும் வழியில் சீன அதிபர் ஜீ ஜின்பிங் Rwanda, Angola, Gabon, and São Tomé and Príncipe ஆகிய நாடுகளுக்குச் சென்று அவற்றை சீனாவின் ஒரு பட்டி ஒரு பாதை என்னும் புதிய பட்டுப்பாதைத் திட்டத்தில் இணைய வேண்டுதல் விடுத்தார். அமெரிக்க அதிபர் டொனால்ட் டிரம்ப் ஆபிரிக்க நாடுகளை “மலவாசல்” நாடுகள் என அழைத்ததால் அந்த நாடுகளில் அமெரிக்காவிற்கு எதிரான ஆத்திரத்தை சீனா சாதுரியமாகத் தனக்கு சாதகமாகப் பயன்படுத்திக் கொண்டிருக்கின்றது.

விற்றுப் பிழைக்கின்றதா சீனா?

சீனாவின் காப்புறுதி நிறுவனங்கள் உட்படப் பல முதலீட்டு நிறுவனங்கள் கடந்த பத்து ஆண்டுகளாக அமெரிக்காவில் கட்டங்களை வாங்கி வந்தன. சின அரசின் வேண்டுகோளுக்கு இணங்க அவை இப்போது விற்பனை செய்யப்படுகின்றது. 2018இன் இரண்டாம் காலாண்டில் 1.29 பில்லியன் டொலர்கள் பெறுமதியான கட்டடங்களை விற்பனை செய்துள்ளன. வாங்கிய கட்டிடங்களின் பெறுமதி 126.2 மில்லியன் டொலர்கள் மட்டுமே. ஒரு பில்லியன் டொலர்கள் பெறுமதியான நிகர விற்பனை சீனா தனது வெளிநாட்டு முதலீட்டைக் குறைக்கும் திட்டத்துடன் இருக்கின்றது என்பதைக் காட்டுகின்றது. சீனாவின் இன்னும் ஒரு பிரச்சனை அதன் அதிகரித்துச் செல்லும் உள்நாட்டுக்கடனாகும். சீனாவின் உள்நாட்டுக்கடன் அதன் பொருளாதார வளர்ச்சியிலும் பார்க்க ஒன்றரைப் பங்கு அதிகரித்துக் கொண்டு போகின்றது.

மார்க்கோ போலோ போன பாதை

இதுவரை காலமும் சீனா மார்க்கோ போலோ பாதையில் (Marco Polo route) உள்ள நாடுகளில் பல கட்டிடங்களில் முதலீடு செய்து வந்தது. தனது நாட்டில் இருந்து ஐரோப்பிய மற்றும் அமெரிக்கக் கண்டகள் வரையான பாதையில் ஆதிக்கம் செலுத்துவதில் அதிக கவனம் செலுத்தியமையைச் சுட்டிக் காட்டியது. புவிசார் அரசியல் காரணங்களுக்காக் சீனா பல நாடுகளுக்குக் கடன் கொடுத்து உருவாக்கிய திட்டங்கள் நட்டத்திலேயே செயற்படுவதால் அந்த நாடுகளின் கடன் சுமையை அதிகரித்துள்ளது. மேற்கு நாட்டு ஊடகங்கள் சீனாவிற்கு எதிரான பரப்புரைக்கு சீனா இலங்கைக்கு கொடுத்த கடன்களை உதாரணமாகக் காட்டுகின்றன.

சீனாவா கொக்கா?

2007-ம் ஆண்டு உலகப் பொருளாதார வளர்ச்சியின் 18 விழுக்காடு சீனாவின் பங்களிப்பாகும். 2017-ம் ஆண்டு அது 30 விழுக்காடாக அதிகரித்திருந்தது. 2008-ம் ஆண்டு நடந்த உலகப் பொருளாதாரப் பிரச்சனையின் பின்னர் உலகப் பொருளாதார வளர்ச்சி முன்னணி வளர்முக நாடுகளான சீனா, இந்தியா, பிரேசில் போன்ற நாடுகளில் இருந்து தான் தூண்டப்பட வேண்டும் எனப் பொருளாதார நிபுணர்கள் எதிர்பார்த்தனர். அவர்களின் எதிர்பார்ப்பு வீண் போகவில்லை. அமெரிக்கா தொடுத்துள்ள பொருளாதாரப் போரால் சீனாவின் பொருளாதார வளர்ச்சி குன்றினால் சீனாவிற்கு மூலப்பொருள்களை ஏற்றுமதி செய்யும் நாடுகளின் பொருளாதார வளர்ச்சி குன்றும். அந்த நாடுகள் எல்லாம் அமெரிக்காவில் இருந்து செய்யும் இறக்குமதி குன்றும். இறுதியில் பாதிப்பு சுற்றிச் சுழன்று கொண்டே இருக்கும். இதை அமெரிக்க அதிபர் டொனால்ட் டிரம்பும் நன்கு அறிவர். ஆனால் அமெரிக்காவிற்கு ஏற்படும் இழப்பிலும் பார்க்க சீனாவிற்கு ஏற்படவிருக்கும் இழப்பு பெரிதாக இருக்கும் என்றபடியால் சீனா அடிபணிந்தே ஆக வேண்டும் என அவர் நம்புகின்றார். அவர் நினைப்பது நடக்குமா?

நேட்டோ அமெரிக்காவிற்கு நியாயமற்ற ஒரு நிதிச் சுமை என்றும் நேட்டோ காலாவதியான ஓர் அமைப்பு என்றும் அடிக்கடி முழங்கிக் கொண்டிருப்பவர் அமெரிக்க அதிபர் டொனால்ட் டிரம்ப். மேற்கு ஐரோப்பாவிற்கு பொதுவுடமைவாதம் பரவுவதை தடுக்க வேண்டிய அவசியம் மேற்கு ஐரோப்பிய நாடுகளிலும் பார்க்க ஐக்கிய அமெரிக்காவிற்கே இருந்தது. ஐக்கிய அமெரிக்காவின் மிகப் பெரிய சந்தையாக மேற்கு ஐரோப்பிய நாடுகள் இருக்கின்றன. இரண்டாம் உலகப் போரால் பெரிதும் பாதிக்கப்பட்ட ஐரோப்பிய நாடுகளைக் கட்டியெழுப்பும் பணியில் வர்த்தக அடிப்படையில் இலாபமீட்டுவதற்கு சோவியத் ஒன்றியத்தின் பொதுவுடமைவாதம் தடையாக இருக்கக் கூடாது என்பதற்காகவே நேட்டோ எனச் சுருக்கமாக அழைக்கப்படும் வட அட்லாண்டிக் ஒப்பந்த நாடுகள் என்னும் படைத்துறைக் கூட்டமைப்பு 1949 ஏப்ரல் மாதம் 4-ம் திகதி உருவாக்கப்பட்டது.

நேட்டோவின் தாரக மந்திரம்

வின்ஸன் சேர்ச்சிலின் படைத்துறைச் தலைமை உதவியாளராக இருந்து பின்னர் நேட்டோ ஆரம்பித்த போது அதன் முதலாவது செயலாளர் நாயகமாகப் பதவி ஏற்றவருமான ஹாஸ்டிங் இஸ்மே ஐரோப்பாவிற்குள் ஐக்கிய அமெரிக்காவைக் கொண்டு வாருங்கள், இரசியாவை அகற்றுங்கள், ஜேர்மனியை அடக்குங்கள் எனச் சொல்லியது நீண்டகாலமாக பிரித்தானியாவின் தாரக மந்திரமாக இருக்கின்றது. பல மற்ற மேற்கு ஐரோப்பிய நாடுகளும் அதை ஏற்றுக் கொண்டு செயற்பட்டன. அதனால் நேட்டோவில் அமெரிக்க முக்கியமான நாடாக இருந்து வருகின்றது. ஐரோப்பாவில் அதிக அளவு மக்கள் தொகையும் மிகப்பாரிய நிலப்பரப்பும் பெரும் கனிம வள இருப்பும் கொண்ட நாடு இரசியா. அதனால் மற்ற ஐரோப்பிய நாடுகள் அதிக கரிசனை கொண்டுள்ளன. இரண்டாம் உலகப் போரின் பின்னர் பொதுவுடமைவாதம் ஆங்கிலக் கால்வாய்வரை இரசியாவால் பரப்பப்படலாம் என்ற அச்சம்தான் 1952இல் நேட்டோப் படைத்துறைக் கூட்டமைப்பை உருவாக்கியது.

தொடரும் இரசிய அச்சம்

தற்போது நேட்டோவில் உள்ள நாடுகள் இரசியாவையிட்டு வேறு வேறான அச்சம் கொண்டுள்ளன. ஆங்கிலக் கால்வாயைத் தாண்டி இரசியகளால் தமது நாட்டுக்குள் வர முடியாது இரசிய விரிவாக்கத்தை அதன் எல்லை நாடுகளிலேயே வைத்து அடக்கிவிடலாம் எனப் பிரித்தானியர்கள் நம்புகின்றனர். எஸ்த்தோனியா, லத்வியா, லித்துவேனியா ஆகிய நாடுகளை இரசியாவால் ஒரு சில மணித்தியாலங்களுக்குள் ஆக்கிரமிக்க முடியும் என அந்த நாட்டு மக்கள் அஞ்சுகின்றனர். அவர்களில் பலர் சோவியத் ஒன்றியம் என்னும் பெயரில் இரசியாவின் காலனித்துவ நாடுகளாக இருந்து பட்டது போதும் எனக் கருதுகின்றனர்.

வளைக்க முயன்ற நேட்டோவும் வளைய மறுத்த இரசியாவும்

சோவியத் ஒன்றியத்தின் வீழ்சிக்குப் பின்னர் இரசியாவை நேட்டோவில் இணைத்து ஜேர்மனியின் தலைமையில் ஐரோப்பாவின் பாதுகாப்புக்கு உத்தரவாதம் அமைத்து அமெரிக்கா ஐரோப்பாவில் இருந்து தனது படைகளை விலக்கி படைத்துறைச் செலவைக் குறைக்கும் திட்டமும் அமெரிக்காவால் முன்வைக்கப்பட்டது. யூக்கோஸ்லாவியாவின் வீழ்ச்சிக்குப் பின்னர் உருவான போக்கன் போர் அந்த திட்டத்தை தவிடு பொடியாக்கிவிட்டது. பராக் ஒபாமா ஐரோப்பாவில் அமைதி நிலவுகின்றது என இரு படைப்பிரிவுகளை ஐரோப்பாவில் இருந்து அகற்றினார். ஆனால் இரசியா உக்ரேனை ஆக்கிரமித்த பின்னர் அவ்விரு படைப்பிரிவுகளையும் மீள அனுப்பினார்.

சேர்த்த சொத்தைப் பாதுகாக்க வேண்டிய அமெரிக்கா

இரண்டாம் உலகப் போர் முடிந்தவுடன் உலக மக்கள் தொகையின் 6.3 விழுக்காடு மக்களைக் கொண்ட அமெரிக்காவின் செல்வம் உலகச் செல்வத்தின் அரைப்பங்காகும். இந்த நிலையில் அமெரிக்காவின் செல்வத்தை பாதுகாக்க பெரும் முயற்ச்சி தேவை என உணரப்பட்டது. அப்போது அமெரிக்க அரச திணைக்களம் வெள்ளை மாளிகைக்கு ஒரு இரகசிய அறிக்கை சமர்ப்பித்தது. அதன் நோக்கம் உலகளாவிய ரீதியில் அமெரிக்காவுக்கு சாதகமாக இருக்கும் உலக செல்வ சம பங்கீட்டின்மையை பாதுக்காப்பதாகும். 1954-ம் ஆண்டு அமெரிக்க வெளியுறவுத் துறை வெள்ளை மாளிகைக்குச் சமர்ப்பித்த இரகசிய அறிக்கையில் அமெரிக்கா நியாயம் நீதி போன்றவற்றிற்கு அப்பால் நின்று செயற்பட வேண்டும் எனத் தெரிவிக்கப்பட்டது. அமெரிக்கா தனது பாதுகாப்புச் செலவை 13 பில்லியன் டொலர்களில் இருந்து 60 பில்லியன் டொலர்களாகவும் அப்போது உயர்த்திக் கொண்டது. எமது எதிரிகளுக்கு எதிராக சதி, மறைமுக அள்ளிவைத்தல் போன்றவற்றில் அதிகமாக ஈடுபட வேண்டும் எனவும் அந்த அறிக்கையில் வலியுறுத்தப்பட்டது.

பங்காளிகளின் பங்களிப்பு

நேட்டோவின் பாதுகாப்பின் 90 விழுக்காட்டை அமெரிக்காவில் செலவில் நடக்கின்றது என்ற அமெரிக்க அதிபர் டொனால்ட் டிரம்பில் கருத்துப் பிழையானது, அமெரிக்காவின் பங்களிப்பு 22 விழுக்காடு மட்டுமே என நேட்டோ அதிகாரிகள் தெரிவித்தனர். நேட்டோ நாடுகள் பாதுகாப்பிற்கான தமது செலவை மொத்தத் தேசிய உற்பத்தியின் 4 விழுக்காடாக அதிகரிக்க வேண்டும் என்ற தனது கோரிக்கையை ஏற்றுக் கொண்டன என்றார் டிரம்ப். கனடியத் தலைமை அமைச்சரும் ஜேர்மனியின் அதிபரும் அப்படி எந்த உடன்பாடும் எட்டப்படவில்லை என்றனர். டிரம்ப் இப்படிக் குழப்பிக் கொண்டிருக்க அமெரிக்கா தொடர்ந்தும் நேட்டோவின் முங்கிய பங்காளராகச் செயற்படும் என மற்ற நாடுகளை நம்பவைக்கும் முயற்ச்சியில் அமெரிக்கப் பாதுகாப்புத் துறைச் செயலர் ஜிம் மத்தீஸ் தீவிரமாக ஈடுபட்டிருந்தார்.

ஜேர்மனி

இரண்டாம் உலகப் போரின் பின்னர் ஜேர்மனியில் 32,000 அமெரிக்கப்படையினர் நிலை கொண்டுள்ளனர். ஜேர்மனியின் பாதுகாப்பிற்கு என அவர்கள் அங்கு இருக்கின்றனர். நேட்டோவின் உச்சி மாநாடு பிரஸ்ல்ஸில் தொடங்குவதற்கு இரண்டு நாட்களுக்கு முன்னர் ஜேர்மனியில் அந்நிய நாட்டுப் படைகள் இருப்பது தொடர்பான கருத்துக் கணிப்பு செய்யப்பட்டது. அதில் 42 விழுக்காட்டினர் அந்நிய நாட்டுப்படைகள் ஜேர்மனியில் இருக்கக் கூடாது எனவும் 37 விழுக்காட்டினர் இருக்கலாம் எனவும் 21 விழுக்காட்டினர் தெரியாது எனவும் கண்டறியப்பட்டது. ஜேர்மனியின் பாதுகாப்புச் செலவு டிரம்ப் சொல்வது போல் மொத்தத் தேசிய உற்பத்தியின் 2விழுக்காடாக இருக்க வேண்டும் என்பதை 72விழுக்காடு ஜேர்மன் மக்கள் எதிர்த்துள்ளனர்.

துருக்கியும் நேட்டோவும்

ஆரம்ப காலம் தொட்டே நேட்டோவின் உருப்பு நாடாக இருக்கும் துருக்கி அண்மைக்காலங்களாக இரசியாவுடன் அதிக நட்பு பாராட்டி வருகின்றது. துருக்கிய அதிபர் ரிசெப் எர்டோகன் தனது அதிகாரங்களை அதிகரிப்பது நேட்டோவின் மக்களாட்சி நியமங்களுக்கு முரணானது என பலரும் கருதுகின்றனர். எர்டோகனின் அரசியல் எதிரிகள் அமெரிக்காவில் இருந்து செயற்படுவதை அவர் கடுமையாக எதிர்ப்பதுடன் அவர்களை நாடுகடத்த வேண்டும் என விரும்புகின்றார். அமெரிக்கா தனது தாட் எனப்படும் ஏவுகணை முறைமையை துருக்கிக்கு விற்பனை செய்யத் தயங்குகின்றது. இதனால் இரசியாவின் எஸ்-400 ஏவுகணை எதிர்ப்பு முறைமையை துருக்கி வாங்க முடிவு செய்தது. இரசியாவின் எஸ்-400 ஏவுகணை எதிர்ப்பு முறைமையை நேட்டோவின் மற்ற நாடுகளின் ஏவுகணை எதிர்ப்பு முறைமைகளின் உணரிகளுடன் இணைக்கக் கூடாது என அமெரிக்கா உட்படப் பல நேட்டோ நாடுகள் ஆட்சேபிக்கின்றன. எல்லாவற்றிலும் மேலாக துருக்கியின் ஐரோப்பிய ஒன்றியத்தின் இணையும் விருப்பத்திற்கு பல மேற்கு ஐரோப்பிய நாடுகள் எதிர்க்கின்றன. ஒரு வலிமை மிக்கதும் அதிக தன்னிலும் பார்க்க அதிக அளவு மக்கள் தொகையைக் கொண்டதுமான துருக்கி என்னும் இஸ்லாமிய நாடு ஐரோப்பிய ஒன்றியத்தில் இணைவதை ஜேர்மனி இரகசியமாக கடுமையாக எதிர்க்கின்றது. அந்த விரக்தியை துருக்கி நேட்டோவிற்கு பிரச்சனை கொடுக்கக் கூடிய நடவடிக்கையால் வெளிப்படுத்துகின்றது.

எண்மியப் பாதுகாப்பு

எண்மியப் பாதுக்காப்கூட்டறிக்கையில் முன்பு எப்போதும் இல்லாத அளவிற்கு 26 தடவைகள் இணையவெளி என்ற சொல் இடம்பெற்றுள்ளது. எண்மியப் பாதுகாப்பிற்கு (digital security) என இரண்டு பிரிவுகள் கூட்டறிக்கையில் ஒதுக்கப்பட்டிருந்தன. இணையவெளிச் செயற்பாட்டகம் ஒன்று பெல்ஜியத்தில் கூட்டுப்படைக் கட்டளையகம் (Joint Force Command)  என்னும் பெயரில் உருவாக்கப்படும். இச்செயற்பாட்டகத்தின் தலைமை நிலையம் அமெரிக்க வெர்ஜீனியா மாநிலத்தில் நோஃபோர்க்கில் அமைக்கப்படும். நேட்டோவின் எல்லா உறுப்பு நாடுகளின் இணையவெளிப் பாதுகாப்பு முறைமை ஒன்றிணைக்கப்படும். இதை எல்லா நாடுகளும் கட்டாயமாகக் கடைப்பிடிக்க வேண்டும் எனவும் தீர்மானிக்கப்பட்டது.  உக்ரேன் நாட்டின் இணையவெளிப்பாதுகாப்பில் அதிக கவனம் செலுத்துவதாகவும் தீர்மானிக்கப்பட்டது. உக்ரேனில் வரவிருக்கும் பொதுத் தேர்தலிலும் இணையவெளியூடான வெளியார் தலையீட்டைத் தடுப்பதாகவும் முடிவு செய்யப்பட்டது.

ஆளணிச் சம்பளச் செலவும் உபகரணச் செலவும்

பிரித்தானியாவினதும் அமெரிக்காவினதும் பாதுகாப்புச் செலவில் மூன்றில் ஒரு பகுதி அதன் படையினருக்கான சம்பளமாக இருக்கின்றது. அமெரிக்கப்படையினரின் சம்பளம் 2001-ம் ஆண்டில் இருந்து 2017வரை எண்பத்தி ஐந்து விழுக்காடாக அதிகரிக்கப்பட்டுள்ளது. பாதுகாப்புச் செலவு என்பது மட்டும் பாதுகாப்பை உறுதி செய்யாது. போர் என்று வரும்போது நேட்டோ நாடுகள் ஒவ்வொன்றும் கூட்டுப் பாதுகாப்பிற்கு எத்தனை படையினரை களத்தில் இறக்கும், அவர்கள் எந்த அளவு அர்ப்பணிப்புடன் போர் புரிவார்கள், எந்த வகையான படைக்கலன்களை களத்தில் ஒவ்வொரு நாடும் பாவிக்கும் எந்த அளவு திறனுடன் படையினரும் படைக்கலன்களும் செய்ற்படுத்தப்படும் என்பதே முக்கியமானதாகும். அமெரிக்காவின் பாதுகாப்புச் செலவு மற்ற நேட்டோ நாடுகளைப் பாதுக்காக்க மட்டும் செய்யப்படுவதல்ல. அமெரிக்காவின் உலக ஆதிக்கத்தை நிலைநாட்ட உலகெங்கும் இருக்கும் அமெரிக்கப் படைத்தளங்களையும் படையினரையும் பராமரிக்க செய்யப்படும் செலவை மற்ற நேட்டோ நாடுகளின் செலவுடன் ஒப்பிட முடியாது.  இரசியா தனது பாதுகாப்புச் செலவில் ஐம்பது முதல் அறுபது விழுக்காட்டை படைக்கலன்கள் மற்றும் உபகரணங்களுக்கு செலவு செய்கின்றது. இந்த விழுக்காடு பிரித்தானியாவில் 21 ஆகவும் ஜேர்மனியில் 14 ஆகவும் கனடாவில் 17 ஆகவும் பெல்ஜியத்தில் ஐந்து ஆகவும் இருக்கின்றது.

மறக்க முடியாத இரு உலகப் போர்கள்

பல பிரச்சனைகளை எதிர் கொண்டாலும் நேட்டோ இல்லாமல் பல சிறிய ஐரோப்பிய நாடுகளால் தாக்குப் பிடிக்க முடியாது. அமெரிக்கா நேட்டோவில் இருந்து விலகிச் சென்றால் மேற்கு ஐரோப்பியப் பாதுகாப்பை ஜேர்மனி உறுதி செய்ய வேண்டி நிலை ஏற்படும். ஜேர்மனி படைத்துறையில் வலிமையடைய நிர்ப்பந்திக்கப்படும். வலிமை மிக்க ஜேர்மனியால் இரண்டு உலகப் போர்கள் உருவானதை மற்ற ஐரோப்பிய நாடுகள் மறக்கவில்லை.

சோவியத் ஒன்றியம் சீனாவின் மீது படையெடுக்கலாம் என்ற அச்சம் உச்சமடைந்த நிலையில் 1972இல் அமெரிக்க அதிபராக இருந்த ரிச்சர்ட் நிக்சன் சீனாவிற்கு செய்த பயணம் உலகப் படைத்துறைச் சமநிலையில் பெரும் மாற்றத்தை ஏற்படுத்தியது. 1979இல் சீனா தனது பொருளாதாரக் கொள்கையை அரச முதலாளித்துவத்திற்கு மாற்றியது உலகப் பொருளாதாரச் சமநிலையில் பெரும் மாற்றத்திற்கு வழி வகுத்தது. சீனா உலகின் தொழிச்சாலையானது. தற்போது உலகின் இரண்டாவது பொருளாதாரமாகக் கருதப்படும் சீனா இனி உலகின் முதலாவது பொருளாதாரமாக மாறி இணையில்லாப் படைத்துறை வலிமை மிக்க நாடாக 2030இல் உருவெடுக்கலாம். இவை யாவற்றையும் சீனா நீண்டகால அடிப்படையில் திட்டமிட்டே மாற்றி வருகின்றது.

அடக்க முடியாத சீனா!

பொருளாதார அடிப்படையில் சீனா ஒரு வெற்றீகரமான நாடாக உருவெடுத்துக் கொண்டிருப்பது பல வகையில் மேற்கு நாடுகளுக்கு அச்சுறுத்தலாக அமைகின்றது. 1. பொருளாதாரத்தில் அபிவிருத்தியடைந்த சீனா தனது படைத்துறையிலும் தன்னிகரில்லாத நிலையை அடையலாம். 2. உயர் தொழில் நுட்பத்தில் மேற்கு நாடுகளை மிஞ்சலாம். 3. உலக ஆதிக்கத்தை அமெரிக்காவிடமிருந்து பறிக்கலாம். 4. சீனா ஒரு கூரிய வல்லரசாக (Sharp Power) உருவெடுக்கலாம் 5. சினா தனது ஆட்சி முறைமை உலகெங்கும் பரப்பலாம். 2018இன் ஆரம்பத்தில் சீனாவின் Tsinghua University இல் நடந்த கலந்துரையாடலில் ஒரு சீன நிபுணர் சீனா அடக்க முடியாத நாடாகிவிட்டது என்றார். சீனா அமெரிக்காவால் அடக்க முடியாத ஒரு நாடாக மாறிவரும் நிலையில்தான் அதன் மீது பொருளாதாரப் போர் தொடுக்கப்பட்டது.

மக்களாட்சிக்கு மாற மறுக்கும் சீனா

முதலாளித்துவமும் மக்களாட்சியும் தனித்து இயங்க முடியாதவை. மக்களாட்சி இன்றி முதலாளித்துவத்தால் நின்று பிடிக்க முடியாது என்பது மேற்கு நாடுகளின் அரசறிவியலாளர்களின் கருத்து. அந்த அடிப்படையிலே மேற்கு நாடுகளின் அரச கொள்கை வகுப்பாளர்களும் செயற்படுகின்றார்கள். பொதுடமையில் இருந்து அரச முதலாளித்துவத்திற்கு மாறிய சீனாவின் அரசியல் சீர்திருத்தம் கொண்டு வரப்பட்டு ஆட்சி முறைமை மாற்றப்படுவது தவிர்க்க முடியாத ஒன்று என எதிர்பார்த்திருந்த மேற்குலக

நாடுகளுக்கு 2017இல் அங்கு செய்யப்பட்ட அரசியல் சீரமைப்பு சீனாவை ஒரு தனியொருவராட்சி நாடாக மாற்றியது பெரும் ஏமாற்றத்தை அளித்தது. சீனாவில் மேற்குலகப் பாணியிலான மக்களாட்சி வருவதற்கு இனி வாய்ப்பே இல்லை என மேற்கு நாடுகள் எண்ணத் தொடங்கி விட்ட நிலையில் வர்த்தகப் போர் ஆரம்பிக்கப்பட்டுள்ளது. இப்போது சீனாவை அடக்க முடியாவிலில் எப்போதும் அடக்க முடியாது என்ற சூழலில் சீனாமீது வர்த்தகப் போர் தொடுக்கப்பட்டது.

  1. பொருளாதார அபிவிருத்தியில் இருந்து படைத்துறை அபிவிருத்தி

2018 மார்ச் மாதம் நடந்த சீனப் பொதுவுடமைக் கட்சியின் மாநாட்டில் உரையாற்றிய சீன அதிபர் ஜீ ஜின்பிங் தற்பாதுகாப்பு நிலையில் இருக்கும் சீனப் படைத்துறை எந்த நாட்டுடனும் போர் செய்து வெல்ல கூடிய உலகத்தரப் படைத்துறையாக மாற்றப்படும் என்றார். அங்கு உரையாற்றிய சீனத் தலைமை அமைச்சர் லீ கெக்கியாங் சீனப் படைத்துறை எல்லா வகையிலும் மேம்படுத்தப்படும் என்றார். அமெரிக்காவைப் போல் பெருமளவு படைத்துறைச் செலவுகளைச் செய்யாமலேயே சீனாவால் உலகின் முதன்மையான படைத்துறையைக் கட்டி எழுப்ப முடியும் எனவும் அந்த மாநாட்டில் தெரிவிக்கப்பட்டது. சீனாவின் படைத்துறை வளர்ச்சியை தடுக்க அதன் பொருளாதார வளர்ச்சியைத் தடுக்க வேண்டும் என அதன் எதிரிகள் நம்புவது இயல்பானதே.

  1. உயர் தொழில் நுட்பத்தில் சீனா மேற்கு நாடுகளை மிஞ்சலாம்.

எண்பதுகளில் சீனாவின் ஏற்றுமதிகளை மேற்கு நாடுகள் தமது நாடுகளுக்கு அனுமதித்த போது சீனா தொழில்நுட்பத்தில் பின் தங்கியே இருந்தது. மேற்கு நாடுகள் தாம் உயர் தொழில்நுட்பத்தில் அதிக கவனம் செலுத்தி சீன உற்பத்தித் துறைக்குத் தேவையான உபகரணங்களையும் தொழில்நுட்ப அறிவையும் தாம் விற்பனை செய்து இலகு வழியில் பெரும் இலாபம் ஈட்டலாம் என நம்பின. அப்படியே பல பத்தாண்டுகள் கழிந்தன. ஆனால் இப்போது சீனா உயர்தொழில்நுட்பத்திலும் வேகமாக முன்னேறிக் கொண்டிருக்கின்றது. அது மற்ற நாடுகளின் தொழில்நுட்பங்களை உலக நியமங்களுக்கு மாறாக பயன்படுத்த தயங்குவதில்லை. உதாரணத்திற்கு ஆளில்லாவிமான உற்பத்தியில் சீனா அமெரிக்காவை மிஞ்சக் கூடிய நிலையை அடைகின்றது. இப்படிப்பட்ட வளச்சிகளால் தொழிற்துறையில் மட்டுமல்ல படைத்துறை உற்பத்தியிலும் சீனா முதலிடத்தை அடையலாம். அதனால் உலகெங்கும் உயர்தொழில்நுட்பங்களையும்

உற்பத்தி உபரகணங்களையும் மட்டுமல்ல படைக்கலன்களையும் ஏற்றுமதி செய்யும் முதன்மை நாடாக சீனா உருவெடுக்கலாம்.

  1. உலக ஆதிக்கத்தை அமெரிக்காவிடமிருந்து சீனா பறிக்கலாம்.

சீனா துயிலெழுந்தால் அது உலகை ஆச்சரியப்பட வைக்கும் என்றார் பிரெஞ்சு வீரர் நெப்போலியன் பொனபார்ட். அது இப்போது நடந்து கொண்டிருக்கின்றது. அமெரிக்கா தனது உலக ஆதிக்கத்தை விரும்பி ஏற்கவில்லை. இரண்டாம் உலகப் போரின் பின்னர் அமெரிக்காவிடம் திரண்டிருந்த சொத்தை அதாவது உலகச் செல்வத்தின் மூன்றில் இருபங்கு செல்வத்தை அது பாதுகாக்கவும் பெருக்கவும் வேண்டிய நிர்ப்பந்தத்தால் அது உலககெங்கும் தனது ஆதிக்கத்தை விரிவாக்கியது. சீனாவும் தனது செல்வ நிலைக்கு ஏற்ப தனது ஆதிக்கத்தை விரிவுபடுத்தியே ஆகவேண்டும். சீனாவின் பொருளாதாரம் தொடர்ந்து வளர்ந்து கொண்டே போனால் அது உலக ஆதிக்கத்தை அமெரிக்காவிடம் இருந்து பறிப்பது தவிர்க்க முடியாத ஒன்றாகிவிடும்.

  1. கூரிய வல்லரசாக (Sharp Powers) சீனா

படை நகர்வுகளையும் நடவடிக்கைகளையும் தவிர்த்து ஏனைய வழிகளால் மற்ற நாடுகளில் ஆதிக்கம் செலுத்தும் நாடுகளை மென்வல்லரசு (soft power) என்பர். படை வலிமை மூலம் மற்ற நாடுகளில் ஆதிக்கம் செலுத்தும் நாட்டை வன்வல்லரசு (Hard Power என்பர். சீன ஆட்சி முறைமை அதிகாரமிக்க தனியொருவரின் ஆட்சியால் நாட்டுக்கும் மக்களுக்கும் மக்களாட்சியிலும் பார்க்க அதிக நன்மை கொடுக்கும் என்பதை அண்மைக்காலமாகப் பறை சாற்றி வருகின்றது. அதே வேளை இரசியாவில் விளடிமீர் புட்டீனும் தனது அதிகாரமிக்க தலைமையால் இரசியா உலக அரங்கில் மீண்டும் ஒரு பெரு வல்லரசாக உருவெடுப்பதாக வெற்றீகரமாகக் காட்டிக் கொண்டிருக்கின்றார். அமெரிக்காவில் டொனால்ட் டிரம்ப் தனது தான் தோன்றித் தனமான நடவடிக்கைகளால் அமெரிக்காவை தான் உலக அரங்கில் முதன்மைப்படுத்துவதாகச் சொல்லிக் கொண்டிருக்கின்றார். இவையாவும் மக்களின் கருத்துச் சுதந்திரத்தைக் குழி தோண்டிப் புதைக்கின்றன. கருத்துச் சுதந்திரத்தை உள்நாட்டில் மறுத்து தமது நிலையைப் பெரிது படுத்தி அதன் மூலம் மற்ற நாடுகளில் தமது நாட்டில் உள்ளது போன்ற ஆட்சி முறைமை ஊக்குவிக்கும் நாடுகளை கூரிய வல்லரசுகள் (Sharp Powers) என அழைக்கப்படுகின்றன. மென் வல்லரசுகள் தமது ஊடகங்களை மற்ற

நாடுகளில் ஆதிக்கம் செலுத்தும் முகமாக பயன்படுத்தும். அவற்றில் சொல்லப்படுபவை முழுமையான பொய்களாக இருப்பதில்லை. ஆனால் பயங்கரமான திசை திருப்பல்களும் திரிபுகளும் அவற்றின் ஊடகங்களில் இருக்கும். கூரிய வல்லரசுகள் பொய்யான தகவல்களை தொடர்ந்து பரப்புரை செய்து அவைதான் உண்மை என எல்லோரையும் நம்பவைக்கும். சீனா, இரசியா, ஈரான் ஆகிய நாடுகளின் ஊடகங்களின் வளர்ச்சியையிட்டு மேற்கு நாடுகள் அதிக கரிசனையடைந்துள்ளன. இதுவரை காலமும் தாம் தகவற்துறையில் செலுத்தி வந்த ஆதிக்கம் ஆட்டம் காண்பதையிட்டு அவை கவலையடைந்துள்ளன. இவற்றிற்கு காரணம் சீனாவினதும் இரசியாவினதும் ஈரானினதும் பொருளாதார வளர்ச்சி என்பதை அவை உணர்ந்து அந்த நாடுகளின் பொருளாதாரத்தை சிதைக்க நடவடிக்கைக்கள் எடுக்கத் தொடங்கி விட்டன.

  1. சீனா ஆட்சி முறைமை

சீனாவில் நடந்த பொதுவுடமைக் கட்சியினரின் கூட்டு ஆட்சி முறைமை ஊழலைப் பெருகச் செய்ததால் தோல்வியடைந்த நிலையில் அங்கு தனியொருவரின் ஆட்சி 2017இன் பிற்பகுதியில் நடந்த சீனப் பொதுவுடமைக் கட்சியின் மாநாட்டில் உருவாக்கப்பட்டது. அரச அதிபராகவும், கட்சியின் பொதுச் செயலாளராகவும், படைத்துறைத் தளபதியாகவும் ஜி ஜின்பிங் முடி சூட்டப்பட்டார். அதிபர் பதவியை ஒருவர் இரு தடவை மட்டுமே வகிக்கலாம் என்ற கட்டுப்பாடு நீக்கப்பட்டு ஜி ஜின்பிங் ஆயுள் முழுவது அதிபராக இருக்க வழி வகுக்கப்பட்டது. இந்த மாற்றம் அமெரிக்கா எதிர்பார்த்துக் காத்திருந்த அரசியல் சீர்திருத்தம் பின்னோக்கி நகர்ததாக அமெரிக்கக் கொள்கை வகுப்பாளர்களை நம்ப வைக்கிறது. ஆனால் சீனப் பொதுவுடமைக் கட்சியினர் நிலைமையை உணர்ந்து தமது நாட்டிற்கு சிறப்பான நன்மை தரக்கூடிய ஆட்சி முறைமையை மாற்றியுள்ளனர். 1976இல் மாவோ சே துங்கின் இறப்பிற்குப் பின்னர் சீனப் பொதுவுடமைக் கட்சியினர் தகுதி அடிப்படையில் தமது தலைமையைத் தெரிவு செய்கின்றனர்.

சீனாவின் ஆட்சி முறைமையும் மக்களின் உரிமை நிலைமையும் கருத்துச் சுதந்திரமும் அமெரிக்காவின் வர்த்தகப் போரால் ஏற்படப் போகும் பாதிப்புக்களை பல ஆண்டுகளுக்கு சீனாவால் சகித்துக் கொள்ளும் தன்மையை சீனாவிற்கு கொடுத்துள்ளது. ஆனால் அமெரிக்காவில் நிலை

அப்படியல்ல. 2018 நவம்பரில் நடக்கவிருக்கும் அமெரிக்கப் பாராளமன்றத்தின் மக்களவையின் எல்லா உறுப்பினர்களுக்கும் மூதவையின் 34 உறுப்பினர்களுக்கும் நடக்கவிருக்கும் தேர்தலின் முடிவுகள் வர்த்தகப் போரையே இல்லாமற் செய்யலாம். அல்லது 2020 நவம்பரில் நடக்கவிருக்கும் அதிபர் தேர்தல் வர்த்தகப் போரை இல்லாமற் செய்யலாம். அதற்குள் வர்த்தகப் போரைத் தீவிரமடையச் செய்ய வேண்டும் என்பதில் டொனால்ட் டிரம்ப் அதிக அக்கறை காட்டுகின்றார்.

சீரிய பாதையில் செல்ல யாருமிலர்

சீனா தனது பாதையில் தொடர்ந்து பயணித்துக் கொண்டே இருக்க அமெரிக்கா தனது பாதையை மாற்றிக் கொண்டே இருக்க வேண்டும். நேரிய பாதையில் செல்லும் சீனா அதிக தூரத்தைக் கடக்கலாம். சீரிய பாதையில் செல்ல யாரும் இலர்.

இரசியா உக்ரேனின் கிறிமியாவைத் தன்னுடன் இணைத்ததில் இருந்து மோசமடைந்திருக்கும் அமெரிக்க இரசிய உறவை டொனால்ட் டிரம்ப்பால் சீராக்க முடியுமா என்ற கேள்வி தற்போது எழுந்துள்ளது. இரசியாவுடன் சிறந்த உறவு உருவாக்கப்படும் என்ற வாக்குறுதியுடன் தேர்தலில் போட்டியிட்டு வெற்றியடைந்த டொனால்ட் டிரம்ப் அவரது வெற்றிக்கு இரசியா உதவியது என்ற குற்றச்சாட்டு வலிமையாக எழுந்ததால் இரசியாவுடனான ஒரு பேச்சு வார்த்தையின் போது விட்டுக் கொடுப்புக்களைச் செய்ய முடியாத நிலைக்கு டிரம்ப் தள்ளப்பட்டார். ஜூலை 16-ம் திகதி டொனால்ட் டிரம்பும் விளடிமீர் புட்டீனும் பின்லாந்தின் ஹெல்சிங்கி நகரில் சந்தித்துப் பேச்சு வார்த்தைகள் நடப்பதற்கான ஏற்ப்பாடுகள் செய்யப்பட்டுள்ளன.

உதவியாளர்களின்றி நேரடிப் பேச்சு வார்த்தை

இதற்கு முன்பு பன்னாட்டு மாநாடுகள் நடக்குமிடங்களில் சந்தித்துப் பேச்சுவார்த்தை நடத்திய அமெரிக்க அதிபர் டொனால்ட் டிரம்பும் இரசிய அதிபர் விளடிமீர் புட்டீனும் முதற்தடவையாக அதிகார பூர்வமாகச் சந்தித்துப் பேச்சு வார்த்தை நடத்தவுள்ளனர். இச் சந்திப்பு வட கொரிய அதிபர் கிம் ஜொங் உன்னுடன் செய்த சந்திப்பை ஒத்ததாக இருக்கின்றது. முதலில் இரு தலைவர்களும் அதிகாரிகளின் உதவியின்றி மொழிபெயர்ப்பாளர்களை மட்டும் உடன் வைத்துக் கொண்டு உரையாட ஏற்பாடு செய்யப்பட்டுள்ளது. பின்னர் அதிகாரிகளையும் வைத்துக் கொண்டு உரையாடல் நடை பெறும். டிரம்ப் அமெரிக்காவின் அதிபராக முன்னர் இரசிய விலைமாதர்களுடன் வைத்திருந்த உறவுகள் தொடர்பான படங்களையும் தகவல்களையும் வைத்து புட்டீன் இரகசியமாக டிரம்பை மிரட்டி தனது தேவைகளுக்குப் பணிய வைக்கலாம் எனவும் சில ஆய்வாளர்கள் கருத்து வெளியிடுகின்றனர். இருவரும் இரகசியமாக வெள்ளைத்தேசியவாதத்தை முன்னெடுப்பவர்கள் என்பது மட்டுமல்ல தாராண்மைவாதத்தையும் கடுமையாக எதிர்ப்பவர்கள். டிரம்ப் தனது இரசிய விசுவாசத்தை G-7 நாடுகளின் மாநாட்டில் உரையாற்றும் போது அந்த அமைப்பில் இரசியாவை மீண்டும் இணைக்க வேண்டும் என வலியுறுத்தி அனைவரையும் ஆச்சரியப்படுத்தினார்.

பின்லாந்துமயமாதலை அமெரிக்காவும் செய்யுமா?

இரசியா மன்னர் ஆட்சியின் கீழ் இருந்த போது இரசியப் பேரரசின் ஓர் உறுப்பு நாடாக பின்லாந்து இருந்தது. பொதுவுடமைப் புரட்சியின் பின்னர் தேசங்களின் தன்னாட்சி அதிகாரங்களுக்கு மதிப்புக் கொடுத்த லெனின் பின்லாந்தைத் தனிநாடாக அனுமதித்தார். அன்றிலிருந்து பின்லாந்து இரசியாவிற்கு அச்சப்படும் ஒரு நாடாகவும் அதனுடன் உறவைப் பேணி அதன் நலன்களுக்கு எதிராகச் செயற்படாத நாடாகவும் இருந்து வருகின்றது. அரசுறவியலில் தான் அச்சப்படும் எதிரி நாட்டுக்கு இசைவாக ஒரு நாடு நடப்பதை பின்லாந்துமயமாதல் (Finlandization) என அழைப்பர். பின்லாந்தில் இரசிய அதிபரைச் சந்திக்கும் டிரம்பும் அமெரிக்காவை பின்லாந்துமயமாக்குவார் என டிரம்புக்கு எதிராக எழுதும் அரசியல் விமர்சகர்கள் கருத்து வெளியிடுகின்றனர். 2016-ம் ஆண்டு டிரம்ப் தனது தேர்தல் பரப்புரையின் போதே இரசியா உக்ரேனை ஆக்கிரமித்ததை நியாயப்படுத்த முயற்சித்திருந்தார். இருவர்களும் சந்திக்கும் போது உக்ரேன் விவகாரத்தால் அமெரிக்கா இரசியா மீது விதித்த பொருளாதாரத் தடை முக்கிய இடம்பெறும். இரசியா தான் இப்போது படைத்துறை அடிப்படையில் மிகவும் வலிமையடைந்துள்ளதாக அடிக்கடி செய்திகள் வெளியிட்டு வருகின்றது

இரசியா சென்ற அமெரிக்க ஆளும் கட்சிப் பாராளமன்ற உறுப்பினர்கள்

அமெரிக்கப் பாராளமன்றத்தின் குடியரசுக் கட்சி உறுப்பினர்கள் 2018 ஜூலை 3-ம் திகதி இரசியப் பாராளமன்ற உறுப்பினர்களைச் சந்தித்தனர். இச்சந்திப்பு வழமையில் இருந்து சற்று மாறு பட்ட ஒன்று என்பது மட்டுமல்ல அமெரிக்க அதிபர் டொனால்ட் டிரம்பும் இரசிய அதிபர் விளடிமீர் புட்டீனும் ஜூலை 16-ம் திகதி செய்யவிருக்கும் சந்திப்பிற்கு முன்னோடியாகவும் அமைந்திருந்தது. எதிர்பார்த்திராத இணக்கமான சூழ்நிலை அங்கு நிலவியதாகவும் செய்திகள் தெரிவிக்கின்றன. குடியரசுக் கட்சியைச் சேர்ந்த மூதவை உறுப்பினர் அமெரிக்காவும் இரசியாவும் போட்டியாளர்கள் மட்டுமே எதிராளிகளாக இருக்க வேண்டிய அவசியமில்லை என இரசிய வெளியுறவுத் துறை அமைச்சர் சேர்கி லாவோவிடம் தெரிவித்தார். அதேவேளை சில இரசியப் பாராளமன்ற உறுப்பினர்கள் டொனால்ட் டிர்ம்ப் தனது தேர்தல் பரப்புரையின் போது உறுதியளித்த இரசியவுடனான உறவைச் சீராக்கல் இன்னும் நிறைவேற்றப்படவில்லை என்ற ஏமாற்றத்தைத் தெரிவித்தனர். இரசியா 2016 நவம்பரில் நடந்த அமெரிக்க அதிபர் தேர்தலில் தலையிட்டமை தொடர்பாக அமெரிக்காவில் நடக்கும் விசாரணைகளும் முன்வைக்கப்படும் குற்றச் சாட்டுகளும் இரு நாடுகளுக்கும் இடையிலான உறவைப் பாதிக்காமல் இருப்பதில் இரு நாட்டுப் பாராளமன்ற உறுப்பினர்களும் கவனம் செலுத்தினர். அமெரிக்கத் தேர்தலின் போது டிரம்பின் பரப்புரையாளர்களுடன் தொடர்பு வைத்திருந்தார் எனக் குற்றம் சாட்டப்படும் அமெரிக்காவிற்கான அப்போதைய இரசியத் தூதுவர் சேர்கி கிலியாக் தற்போது இரசியப் பாராளமன்றத்தின் மூதவை உறுப்பினராக இருக்கின்றார் இரசியா வந்துள்ள பாராளமற உறுப்பின்ரகளில் பலரை எனக்கு நேரடியாகத் தெரியும் என்றார் அவர். அமெரிக்கப் பாராளமன்ற உறுப்பினர்கள் தமக்கு விளடிமீர் புட்டீனைச் சந்திக்க வாய்யளிக்காமல் விட்டதையிட்டு சற்று அதிருப்தியடைந்தனர். மக்களாட்சிக் கட்சியின் பாராளமன்ற உறுப்பினர்கள் அமெரிக்க அதிபர் தேர்தலில் இரசியத் தலையீடு பற்றி குடியரசுர்க் கட்சியினரிலும் பார்க்க அதிக அளவு ஆத்திரமடைந்துள்ளனர். அதே வேளை 2018 நவம்பரில் நடக்கவிருக்கும் பாராளமன்றத் தேர்தலில் மக்களாட்சிக் கட்சியினர் வெற்றி பெறும் வாய்ப்பு அதிகம் இருப்பதால் குடியரசுக் கட்சியினர் மட்டும் சீராக்கும் இரசியாவுடனான உறவு எந்த அளவு நின்று பிடிக்கும் என்பது கேள்விக் குறியே.

புதிய தொடர்பாடல் வழி

அமெரிக்கப் பாராளமன்ற உறுப்பினர்களின் இரசியப் பயணத்திற்கு ஒரு வாரத்திற்கு முன்னர் அமெரிக்காவில் பாதுகாப்புத் துறை ஆலோசகர் ஜோன் போல்டன் இரசியா சென்று டிரம்ப்-புட்டீன் சந்திப்புப் பற்றிக் கலந்துரையாடியிருந்தார். சீனாவும் வட கொரியாவும் அமெரிக்காவுடனான பேச்சு வார்த்தைகளுக்கு அமெரிக்க வெளியுறவுத் துறையை ஓரம் கட்டிவிட்டு நேரடியாக வெள்ளை மாளிகை அதிகாரிகளுடன் தொடர்புகளை ஏற்படுத்தியுள்ளனர். அதில் ஜோன் போல்டன் பகிரங்கமாகவும் டிரம்பின் மருமகன் ஜெரார்ட் குஷ்னர் இரகசியமாகவும் பெரும் பங்கு வகித்தனர்.

சிரியாவில் இரசியர்களைப் போட்டுத் தள்ளிய அமெரிக்கா

2018-ம் ஆண்டு மார்ச் மாதம் சிரியாவில் அமெரிக்கப்படையினரின் கட்டுப்பாட்டில் உள்ள Deir Ezzor பிரதேசத்தில் சிரிய அரச படையினரும் இரசியத் தனியார் படையினரும் ஒரு கூட்டுத் தாக்குதலை முன்னறிவித்தல் ஏதுமின்றி மேற்கொண்டனர். அமெரிக்க வான்படையினர் செய்த பதலடித் தாக்குதலால் முன்னூறுக்கும் மேற்பட்ட இரசியத் தனியார் படைவீரர்கள் கொல்லப்பட்டனர். இதை இரசியா பகிரங்கப்படுத்தவில்லை. 1950-ம் ஆண்டு நடந்த கொரியப் போரின் பின்னர் அதிக அளவிலான இரசியர்களை அமெரிக்கப்படை அங்கு கொல்லப்பட்டனர். இந்த நிகழ்வு இரு நாடுகளுக்கும் இடையிலான உறவைப் பாதிக்கவில்லை.

ஈரானுக்கு எதிரான அமெரிக்கப் போர்

அமெரிக்காவிற்கும் இரசியாவிற்கும் இடையில் பிரச்சனைக்குரிய ஒன்றாக ஈரானும் இருக்கின்றது. இரு நாடுகளும் ஈரான் அணுக்குண்டு உருவாக்குவதை விரும்பவில்லை. ஆனால் ஈரானுடனான ஒப்பந்தத்தை அமெரிக்கா ஒருதலைப் பட்சமாக இரத்துச் செய்ததை இரசியா எதிர்க்கின்றது. ஈரானுக்கு எதிராக ஒரு படை நடவடிக்கையை அமெரிக்கா செய்ய வேண்டும் என சவுதி அரேபியாவும் இரகசியமாகத் தூண்டுகின்றன.

மத்திய அமெரிக்கா

சிரியாவில் பஷார் அல் அசாத்தின் ஆட்சியைத் தக்கவைப்பதில் விளடிமீர் புட்டீன் காட்டிய அக்கறையை வெனிசுவேலாவில் நிக்கொலஸ் மதுராவின் ஆட்சியைத் தக்கவைப்பதில் காட்டவில்லை. ஆனால் சிரியாவில் செய்தது போல் வெனிசுவேலாவில் அமெரிக்காவின் நடவடிக்கைகக்ளுக்கு குந்தகம் விளைவிப்பதில் புட்டீன் அக்கறை காட்டுகின்றார். அதனால் சிரியாவிற்கு அனுப்பியது போல் வெனிசுவேலாவிற்கு இரசியப் படைகளை அனுப்பவில்லை. அனுப்பப்போவதுமில்லை. ஆனால் கடந்த ஓராண்டாக டொனால்ட் டிரம்ப் தன் உயர் அதிகாரிகளுடனும் பல உலகத் தலைவர்களுடனும் வெனிசுவேலாவிற்கு அமெரிக்கப் படைகளை அனுப்புவது பற்றி உரையாடிவருகின்றார் மத்திய அமெரிக்க நாடான வெனிசுவேலாவில் அரசுக்கு எதிரான ஆர்ப்பாட்டங்கள் தொடர்ந்து நடந்து வருகின்றன. டிரம்ப்-புட்டீன் சந்திப்பில் வெனிசுவேலா முக்கிய இடம்பெறும்.

கரிசனை கொள்ளும் ஐரோப்பா

இதுவரை காலமும் அமெரிக்காவுடன் இணைந்து இரசியாவை எதிர்த்து வந்த ஐரோப்பிய நாடுகள் தங்களை அமெரிக்காவை முதன்மைப் படுத்தும் கொள்கை கொண்ட டிரம்ப் விற்றுவிடுவாரோ எனக் கரிசனையடைந்துள்ளன. குறிப்பாக உக்ரேனை டிரம்ப் கால்வாருவாரா என்ற கரிசனை அதிகமாக உள்ளது. முன்னாள் சோவியத் ஒன்றிய நாடுகளை மீளவும் இரசியாவுடன் இணைக்க வேண்டும் என்ற கொளையுடையவர் புட்டீன். பத்து ஆண்டுகளுக்குமேல் ஆட்சியில் இருக்கும் முன்னாள் இரசிய உளவுத் துறை உயர் அதிகாரியான புட்டீன் ஏமாற்றிவிடுவாரா என்ற கரிசனையும் பலரிடம் உள்ளது. 2018இல் புட்டீன் தேர்தலில் வெற்றி பெற்ற போது அவருக்கு வாழ்த்துச் செய்தை அனுப்ப வேண்டாம் என அமெரிக்க வெளியுறவுத்துறை டிரம்ப்பிற்கு அறிவுரை சொல்லியிருந்தது. அதைப் புறக்கணித்து தனது வாழ்த்தைத் தெரிவித்தவர் டிரம்ப் என்பதையும் ஐரோப்பியர் அறிவர். ஐரோப்பிய ஒன்றியத்தை விரும்பாத டிரம்ப் அதற்கு எதிராகவும் தனது வர்த்தகப் போரை ஆரம்பித்துள்ளார்.

நேட்டோ

டிரம்ப் நேட்டோ என்பது காலவதியான் ஒன்று என்ற கொள்கையுடையவர். டிரம்ப் புட்டீனைச் சந்திப்பதற்கு ஒரு சில நாட்கள் முன்னதாக அதாவது ஜூலை 11-ம் திகதியும் 12-ம் திகதியும் நேட்டோவின் உச்சி மாநாட்டில் புட்டீனைத் திருப்திப்படுத்தும் வகையில் டிரம்ப் செயற்படலாம் எனவும் மேற்கு ஐரோப்பிய ஊடகங்கள் செய்தி வெளியிட்டுள்ளன. ஏற்கனவே நோர்வே, ஜேர்மனி, கனடா, பெல்ஜியம் ஆகியவை உட்படப் பல நேட்டோ உறுப்பு நாடுகளுக்கு அவற்றின் பாதுகாப்புச் செலவை உயர்த்தும்படி கடுமையான வார்த்தைப் பிரயோகங்களுடன் கடிதம் எழுதியுள்ளார்.

அமெரிக்கப் பாராளமன்றத்தின் மூதவையின் புலனாய்வுக்கான குழு 2016 நடந்த அமெரிக்கத் தேர்தலில் இரசியா தலையிட்டது என்பதை 2018 ஜூலை முதல் வாரத்தில் உறுதி செய்துள்ளது. அதனால புட்டீனால் தேர்தலில் வெற்றி பெறவைக்கப்பட்டவர் என்ற குற்றத்தைச் சுமந்து நிற்கும் டிரம்பால் புட்டீனுக்காக எந்த விட்டுக் கொடுப்பையும் செய்ய முடியாத நிலை உருவாகியுள்ளது. எல்லாவற்றிற்கும் மேலாக புட்டீன் 2016 நவம்பரில் நடந்த அமெரிக்க அதிபர் தேர்தலில் இரசியத் தலையீடு தொடர்பான விசாரணையை நிறுத்தும் கோரிக்கையை இரகசியமாக முன்வைக்கலாம். அது ஆளும் குடியரசுக் கட்சிக்குள் பெரும் பிளவை ஏற்படுத்தலாம். உனக்கும் வெற்றி எனக்கும் வெற்றி என்ற நிலையை உருவாக்காமல் எந்த ஒரு பேச்சு வார்த்தையும் நல்லபடியாக நிறைவேறாது.

சீனாவிற்கு என்று ஒரு மிக நீண்ட வரலாறும் கலாச்சாரமும் இருக்கின்ற போதிலும் அதன் தற்போதைய ஆட்சி முறைமையும் பொருளாதாரக் கட்டமைப்பும் மிகவும் புதியதும் வளர்ச்சியடையாத ஒன்றுமாகும் என மேற்குலக அரசியல் ஆய்வாளர்கள் சொல்கின்ற போதிலும் அது தொடர்ந்து முப்பது ஆண்டுகளுக்கு மேலாக பொருளாதார வளர்ச்சியைப் பேணி வருகின்றது. எந்த ஒரு முதலாளித்துவ நாடும் அப்படி ஒரு சாதனையை செய்ததில்லை. 1978-ம் ஆண்டு சீனா செய்த பொருளாதாரச் சீர்திருத்தம் எண்பது கோடி மக்களின் வறுமையை நீக்கியது எனச் சொல்வதா அல்லது மேற்கு நாடுகளில் நிலவிய தாராண்மைவாதத்தை சீனா பயன்படுத்தி தனது பொருளாதாரத்தை மேம்படுத்தியது எனச் சொல்வதா?

மேற்கு நாடுகளில் பணவீக்கம் பெரும் பிரச்சனையாக இருந்த போது சீனாவில் இருந்து இறக்குமதி செய்யப்பட்ட மலிவான பொருட்கள் பணவீக்கத்தைத் தணிக்க உதவின. சீனாவின் பொருளாதாரம் வளர்ந்தால் சீனா தமது நாடுகளில் இருந்து கொள்வனவுகளை மேற்கொள்ளும் அதனால் தமது நாடுகளின் பொருளாதாரம் நன்மையடையும் என மேற்குலகில் உள்ள தாராண்மைவாத ஆட்சியாளர்கள் நம்பினர். ஆனால் கடந்த முப்பது ஆண்டுகளாக சீனா மேற்கு நாடுகளுக்கு மட்டுமல்ல உலகின் பெரும்பாலான நாடுகளுக்குச் செய்யும் ஏற்றுமதி அது அந்த நாடுகளில் இருந்து செய்யும் இறக்குமதியிலும் பார்க்கக் குறைவாகவே உள்ளது. இந்த நிலை தொடர முடியாது சீனா தனது நாட்டுக்கான ஏற்றுமதியில் கட்டுப்பாடுகளை விதிக்க முடியாது தனது பொருளாதாரத்தைத் மற்ற நாடுகளுக்கு திறந்துவிடக்கூடிய வகையில் பொருளாதாரச் சீர்திருத்தம் செய்ய வேண்டும் என்ற கோரிக்கை நாளுக்கு நாள் உலக அரங்கில் வலிமையடையும் வேளையில் மேற்கு நாடுகள் பலவற்றில் தாராண்மைவாதிகள் தேர்தலில் தோல்வியடைந்து தேசியவாதிகள் ஆட்சிகளைக் கைப்பற்றிக் கொண்டிருக்கின்றனர்.

சீனாவின் மொத்தத் தேசிய உற்பத்தியில் அதன் ஏற்றுமதி 18 விழுக்காடாக இருக்கின்றது. 2017-ம் ஆண்டு சீனா அமெரிக்காவிற்குச் செய்த ஏற்றுமதி 506பில்லியன் டொலர்கள் பெறுமதியானது. ஆனால் சீனா அமெரிக்காவில் இருந்து செய்த இறக்குமதியின் பெறுமதி 130பில்லியன் டொலர்கள் மட்டுமே. இதுதான் அமெரிக்கத் தேசியவாதிகளை ஆத்திரப்படுத்துகின்றது. இதனால்தான் சீனாவில் இருந்து இறக்குமதி செய்யும் பொருட்களுக்கான வரியை டொனால்ட்

டிரம்ப் அதிகரித்து வர்த்தகப் போர் தொடுத்துள்ளார். பதிலடியாக சீனாவும் அமெரிக்காவில் இருந்து இறக்குமதி செய்யும் பொருட்களுக்கான வரியை அதிகரிக்கின்றது. ஆனால் இதில் அதிகம் பாதிக்கப்படப் போவது அதிக ஏற்றுமதி செய்யும் சீனாவே என டொனால்ட் டிரம்ப் நம்புகின்றார். அது மட்டுமல்ல மேற்குலகத் தேசியவாதிகள் சீனாவின் பொருளாதார வளர்ச்சி அதன் படைத்துறைவளர்ச்சிக்கே வித்திடுகின்றது. எமது நாடுகளுக்கு ஏற்றுமதி செய்து அப்பணத்தில் படைக்கலன்களை உருவாக்கி எமது நாடுகளுக்கே அச்சுறுத்தல் கொடுக்கும் நாடாக சீனா உருவாகின்றது என மேற்குலகத் தேசியவாதிகள் ஆத்திரப்படுகின்றார்கள். சீனாவும் தனது பொருளாதாரம் ஏற்றுமதியில் தங்கியிருப்பதை விரும்பவில்லை. உள்நாட்டு மக்களின் கொள்வனவை அதிகரிக்கவே அது விரும்புகின்றது. அதற்கு உள்நாட்டு மக்களின் வருமானத்தை அதிகரிக்க வேண்டும். அப்படி அதிகரித்தால் சீனா எந்த ஒரு உற்பத்தியையும் ஏற்றுமதி செய்ய முடியாதவாறு சீனப் பொருட்களின் உற்பத்திச் செலவு அதிகரிக்கும்.

சீனா தனது ஏற்றுமதியால் கிடக்கும் பணத்தைக் கொண்டு மேற்குலக வர்த்தக நிறுவனங்களை வாங்கி அவற்றின் தொழில்நுட்பத்தை தனதாக்கிக் கொள்கின்றது என்பதையிட்டும் மேற்குலகத் தேசியவாதிகள் கரிசனை கொண்டுள்ளனர். அது மட்டுமல்ல சீனா இணையவெளியூடாக தமது தொழில்நுட்ப இரகசியங்களைத் திருடுவதாகவும் அவர்கள் குற்றம் சாட்டுகின்றனர். இதுவும் அமெரிக்கா சீனாமீது இறக்குமதிக்கான வரி அதிகரிப்பால் செய்யப்படும் வர்த்தகப் போரின் ஒரு காரணியாகும்.

தமதமாகும் திருத்தம்

சீனா தனது பொருளாதாரத்தைச் சீர்திருத்தம் செய்வேன் என்றும் தனது நாட்டுப் பொருளாதாரம் திறந்து விடப்படும் என்றும் கடத்த பல பத்தாண்டுகளாக அடிக்கடி சொல்லி வந்தாலும் அது நிறைவேற்றப்படாத ஒன்றாகவே இருக்கின்றது. சீனாவின் பொருளாதாரம் சீர்திருத்தம் செய்யப் படும்போது அத்துடன் இணைந்த அரசியற் சீர்திருத்தமும் செய்யப்படவேண்டும் என்பதே சீனப் பொதுவுட்மைக் கட்சிக்காரர்களின் அச்சமாகும். அரசியற் சீர்திருத்தம் பலகட்சி முறைமையைக் கொண்டுவரும் அது பொதுவுடமைக் கட்சியின் ஆதிக்கத்தைப் பாதிக்கும். திறந்த பொருளாதாரம் நாட்டில் ஆட்சியின் பிடியைத் தளர்த்துவதுடன் சீனாவில் மேற்குகலக ஊடக ஆதிக்கத்திற்கும் வகுக்கும். அதனால் சீனப் பொருளாதாரத்தை வெளிநாட்டு முதலீட்டாளர்களின் கைகளுக்குச் செல்ல வாய்ப்புண்டு. சீன அதிபர் ஜீ ஜின்பிங் சீனாவில் சீர்திருத்தங்களைக் கொண்டு வராமல் தனது பிடியை கட்சியும் ஆட்சியிலும் இறுக்கினார்.

சீனாவில் உள்நாட்டுக் கிளர்ச்சி

சீனா தனது பொருளாதாரக் கதவுகளைத் திறக்காவிடில் அதை வெளியில் இருந்து உடைக்கும் முயற்ச்சி அதற்கு எதிரான வர்த்தகப் போராகும். அதை உள்ளிருந்து உடைப்பது என்பது சிரமமான ஒன்றாகும். சீன அரசு தனது குடிமக்கள் மீதான தனது கண்காணிப்பை நவீன கருவிகளைக் கொண்டு அதிகரித்து வருகின்றது. இந்த நிலையில் சீனாவின் முன்னாள் படைவீரர்கள் அரசுக்கு எதிராகக் கிளர்ந்துள்ளனர். சீனாவின் முன்னாள் படைவீரர் ஒருவர் தனக்கு கொடுக்கப்படும் ஓய்வூதியம் அதிகரிக்கப்பட வேண்டும் என்ற மனுவைக் கொடுக்கச் சென்றிருந்த வேளையில் அவர் காவற்துறையினரால் தாக்கப்பட்டார். இதை ஆட்சேபித்து பல்லாயிரக்கணக்கான முன்னாள் படைவீரர்கள் ஆட்சேபணை தெரிவுக்கும் கூட்டத்தை நடத்தியுள்ளனர். அதிக வயதான மக்கள் தொகையைக் கொண்ட சீனாவில் ஓய்வூதியக் கொடுப்பனவு ஒரு பெரும் பிரச்சனையாக இருக்கின்றது. சீனாவில் 57மில்லியன் முன்னாள் படைத்துறையினர் இருக்கின்றனர். இவர்களின் அடியை ஒட்டி மற்ற முன்னாள் அரச ஊழியர்களும் போராட்டம் செய்யலாம். அது ஒரு போராட்டக் கலாச்சாரத்தை சீனாவில் வளரச் செய்ய வாய்ப்புண்டு. அதற்கு எதிராக சீன அரசு கடும் நடவடிக்கை எடுத்தால் அது அரசுக்கு எதிரான கிளர்ச்சியாக உருவெடுக்கலாம். இது சீனாவின் கதவுகளை உள்ளிருந்து உடைக்கும் நிலைமையை ஏற்படுத்தும். அதற்கு மேற்கு நாடுகள் தூபமிடலாம். ஆனால் அதை எல்லாம் அடக்கும் அனுபவம் சீனாவிற்கு உண்டு.

சீனா மாற்றி யோசிக்குமா?

சீனா தனது வெளிநாட்டு ஏற்றுமதிக்கு மேற்கு நாடுகளில் தங்கி இருக்காமல் அதன் அயல்நாடான இந்தியாவுடன் தனது வர்த்தகத்தை வளர்க்கலாம். 2017-ம் ஆண்டு இந்தியாவையும் பாக்கிஸ்த்தானையும் சீனாவும் இரசியாவும் உருவாக்கிய ஷாங்காய் ஒத்துழைப்பு அமைப்பில் உறுப்பு நாடுகளாக இணைத்துக் கொள்ள சீனா சம்மதித்தது.

1956-ம் ஆண்டு கூட்டுச் சேரா நாடுகள் அமைப்பை உருவாக்குவதில் இருந்து மற்ற நாடுகளுடன் இணைந்து செயற்பட்ட இந்திய இப்போது அந்த அமைப்பில் இருந்து மெதுவாக நழுவிக் கொண்டு மேற்கு நாடுகளுடன் கூட்டுச் சேருகின்றது. 1991-ம் ஆண்டு பனிப்போர் முடிவுற்கு வந்த பின்னர் அந்த அமைப்பு தேவையற்ற ஒன்றாகிவிட்டது என இந்தியக் கொள்கை வகுப்பாளர்கள் கருதுகின்றனர். சீனப் பொருளாதாரமும் படைத்துறையும் துரிதமாக வளர்வதால் தனக்கு ஏற்பட்ட அச்சுறுத்தலைச் சமாளிக்க அது மேற்கு நாடுகளுன் இணைந்து செயற்பட வேண்டிய நிலை உருவானது. இந்தியாவின் பழப் பெரும் அரசுறவியல் ஞானியான சாணக்கியரின் போதனை “உன் அயலவன் உனக்கு இயற்கையாகவே எதிரியாக இருப்பான். அதனால் அவனுக்கு எதிரியாக உள்ள அவனது அயலவனுடன் நீ நட்பை வளர்த்துக்கொள்” என்பதாகும். பசுபிக் பிராந்தியத்தில் அமெரிக்கா வியாபித்து இருப்பதல் அது சீனாவின் ஓர் அயல் நாடுபோல் இருக்கின்றது. இதனால் இந்தியா

அமெரிக்கா, ஜப்பானுடன், ஒஸ்ரேலியா ஆகிய நாடுகளின் நட்பாக இருக்க வேண்டிய நிலை உருவானது. இஸ்ரேலுக்கு அடுத்தபடியாக அமெரிக்கா இந்தியாவுடன் அதிக அளவு தொழில்நுட்ப ஒத்துழைப்பைச் செய்கின்றது. அதற்குப் பதிலாக அமெரிக்காவுடன் இந்தியா LEMOA எனச் சுருக்கமாக அழைக்கப்படும் The Logistics Exchange Memorandum of Agreement ஒப்பந்தத்தைச் செய்துள்ளது. அதன் படி இந்தியாவின் படை நிலைகளை அமெரிக்கா தேவை ஏற்படும் போது பாவிக்கக் கூடிய ஏற்பாடு செய்யப்பட்டுள்ளது. இது சீனாவிற்கு எதிரான அமெரிக்கப் படைத்துறை நிலையை அமெரிக்காவிற்குச் சாதகமான சூழலை உருவாக்கியுள்ளது. 2007-ம் ஆண்டு ஜப்பானியத் தலைமை அமைச்சரின் முயற்ச்சியால் நான்முனைப் பாதுகாப்பு உரையாடல் என்னும் அதற்குப் பதிலாக அமெரிக்காவுடன் இந்தியா LEMOA எனச் சுருக்கமாக அழைக்கப்படும் The Logistics Exchange Memorandum of Agreement ஒப்பந்தத்தைச் செய்துள்ளது. அதன் படி இந்தியாவின் படை நிலைகளை அமெரிக்கா தேவை ஏற்படும் போது பாவிக்கக் கூடிய ஏற்பாடு செய்யப்பட்டுள்ளது. இது சீனாவிற்கு எதிரான அமெரிக்கப் படைத்துறை நிலையை அமெரிக்காவிற்குச் சாதகமான சூழலை உருவாக்கியுள்ளது. 2007-ம் ஆண்டு ஜப்பானியத் தலைமை அமைச்சரின் முயற்ச்சியால் அலுவல் முறைசாரா அமைப்பு ஒன்று உருவாக்கப்பட்டது. அதன் செயற்பாடுகளில் ஒன்றாக மலபார் போர்ப்பயிற்ச்சி செய்யப்படுகின்றது. இப்போர்ப்பயிற்ச்சி வரலாறு காணாத பெரிய போர்ப்பயிற்ச்சியாகக் கருதப்படுகின்றது.

இந்தியாவை இழுக்க முயன்ற சீனா

இந்திய சீன உறவில் எல்லைப் பிரச்சனை பல ஆண்டுகளாக தீர்க்க முடியாததாக இருக்கின்றது. இப்போது சீனாவின் புதிய பட்டுப்பாதை எனப்படும் One Belt One Road Initiative மேலும் ஒரு பிரச்சனையை இரு நாடுகளுக்கும் இடையில் ஒரு பிரச்சனையை உருவாக்கியுள்ளது. அதன் ஒரு அம்சமான சீனாவிற்கும் பாக்கிஸ்த்தானுக்கும் இடையிலான பொருளாதாரப் பாதை பாக்கிஸ்த்தானின் கட்டுப்பாட்டில் உள்ள கஷ்மீர் ஊடாகச் செல்கின்றது. முழுக் கஷ்மீரும் தனக்குச் சொந்தம் எனச் சொல்லும் இந்தியா அதைக் கடுமையாக ஆட்சேபிக்கின்றது. இந்தியத் தலைமை அமைச்சர் நரேந்திர மோடியை நேரில் சந்தித்த போது சீன அதிபர் ஜீ ஜின்பிங் தமது பட்டுப்பாதையில் சீனா இணைய வேண்டும் என வேண்டுதலும் விடுத்திருந்தார். சீனாவின் புதிய பட்டுப்பாதையைக் பகிரங்கமாக எதிர்க்கும் இந்தியா அந்த வேண்டு கோளைப் பற்றி ஏதும் சொல்லவைல்லை.

அமெரிக்காவைச் சீண்ட சீனா தயங்குவதில்லை

ஜிபுக்தியிலும் பசுபிக் கடற்பிராந்தியத்திலும் அமெரிக்கப் போர் விமானிகளின் பார்வைக்கு குந்தக்கம் ஏற்படும் வகையில் சீனா அவர்களை நோக்கி லேசர் கதிர்களைப் பாய்ச்சுவதாக அமெரிக்கா குற்றம் சாட்டுகின்றது. இது ஒரு போர் என்று வரும் போது வலிமை மிக்க

அமெரிக்க வான்படையை எப்படிக் கையாள்வது என்பதை சீனா பரீட்சித்துப் பார்கின்றது போல் இருக்கின்றது. சீனாவின் இந்தப் படைத்துறை ரீதியான தன்னம்பிக்கையை உடைக்க மேற்கு நாடுகள் பொருளாதார அடிப்படையில் சீனாவைச் சிதைக்கச் சதி செய்யலாம்.